Shillong, Nailar 01:
Ka North East Students Organisation (NESO) kaba dei ka kynhun jong ki samla pule na ki jylla ka thaiñ shatei lam mihngi hapoh ka jingïalam u Bah Samuel Jyrwa kum u Chairman ki la leit jngoh ïa ka Manipur na ka bynta ban wanrah ïa ka shongsuk shongsaiñ hadien ka jingïakynad hapdeng ki ar jaidbynriew ha katei ka jylla ha kine ki lai bnai ba la dep kaba dang bteng kat haduh mynta.
Ka kynhun ka NESO ka la poi mynta ka sngi ka 1 tarik Nailar, 2023 ha Manipur bad kan sa pynlut kumba lai sngi ha katei ka jylla ban ïakynduh ïa ki kynhun bapher bapher ban wanrah ïa ka jingïasuk ha katei ka jylla.
Haba pyrshang ban ïakren bad u Bah Samuel Jyrwa lyngba ka phone u la ïathuh ba ka NESO ka la poi mynta ka sngi ha Imphal ban leit jngoh ïa ki briew kiba la pynsah kyrpang ha Moirang kaba hap ha Bishnupur district bad lashai ka sngi kin leit jngoh sha Chorachandpur district.
Ha kajuh ka por u la pyntip ba ka seng kan pyrshang ban ïakynduh ïa u Myntri Rangbah ka Manipur, u Biren Singh bad ïa u Lat ka jylla, bad kumjuh ruh ïa ki seng na ka jaidbynriew Meitei.
“Haduh mynta ngim pat tip la kane ka jylla ka shongsuk shongsaiñ ne ka dang jur ka jingïakynad namar ngi dang shu poi sha Manipur, hynrei ha nongbah Imphal, ngi la ïohi ba ka la sdang jai-jai” u la ong.
U Bah Samuel u la pyntip ba ka kynhun kan ïakynduh ruh ïa ki seng na ki jaidbynriew Meitei bad Kuki.
Kiba la leit mihkhmat ïa ka NESO na jylla Meghalaya ki kynthup ïa ka Khasi Students’ Union (KSU) hapoh ka jingïalam u Bah Lambokstarwell Marngar kum u President, Donald Thabah kum General Secretary, Daniel Khyriem uba dei u Coordinator ka NESO bad ki nongïalam ka Garo Students’ Union.
Ha kane ka jingleit ka NESO la ïoh jingtip ba ki don ki bynta ba ki hap ban leit da ka helicopter namar ki pulit kim pat shah ban ïaid da ka kali ha surok namar ki don ki jaka ki bym pat shngaiñ.
Ka jingïakynad hapdeng ki Kuki bad ki Meitei ha jylla Manipur ka la sdang naduh ka 4 tarik Jymmang, 2023 kaba la neh mynta la jan lai bnai kynthih haduh ka 4 tarik Nailar, 2023.
