Shillong, Nailar 01:
Ha kine ki sngi bun ki nongshong shnong ki la buh jingkylli ïa ka Meghalaya Energy Corporation Ltd (MeECL) haba ïadei bad ka jingbymbiang ka bording ilektrik khamtam haba la jur ka jinghap slap ha kaba ki pung kiba den ban pynmih bording ilektrik kum ka pung Umïam ki la dap um smam.
Hynrei ki nongshong shnong ki dei ban tip kawei ka jingshisha ba ka MeECL ka pynmih duna bha ka bording ilektrik, katba ka jingdawa bording ilektrik ha kane ka Jylla ka long shaba palat, kham bun ban ïa kaba jingpynmih.
U Nongsaiñ Hima u la ïoh lum jingkheiñ halor ka jingpynmih bording ilektrik ka Jylla ha kine ki bnai ba hap slap bad ha ki bnai ba rang tyrkhong. Ka jingïapher ka long bak-ly-bak hapdeng ka jingdonkam bording bad ka jingpynmih bording.
Ka jingdonkam bording ki nongshong shnong ka Jylla ka long haduh 6.67 Million Unit (MU) katba ha kine ki bnai ba hap slap bad ba kham biang ka um, ka Jylla ka lah ban pynmih bording ilektrik tang 3.741 Million Unit (MU). Kane ka mut ba ka jingduna bording ilektrik ha Jylla ka long 2.929 Million Unit (MU).
Ïa kane ka jingduna la hap ban pyndap da kaba shu thied bording na shabar kynthup na ki kompani kiba ju die bording ha India bad power grid.
Ka jingdawa bording ilektrik ka la nang jur katba nang mih ki sngi ki snem, katba ka jingpynmih bording ilektrik ka duna. Ban den ïa ki wah ha ki katto katne ki jaka na ka bynta ban pynmih bording ilektrik ruh ki mih shibun ki jingeh khamtam haba mih ka jingpyrshah.
Ka Meghalaya ka dang donbok ba ïa ka pung Umïam ruh la den naduh ka por jong ka Sorkar Assam. Lada dei ba ïa ka pung Umïam la den ha kine ki khyndiat snem, katta la mih ki jingpyrshah ki bym lah shuh ban batai, naduh ki seng ki bym lah ñiew shuh haduh kiba kam trai ïa ki jaka ha ka kyrteng ban ïada ïa ka khyndew ka shyiap.
