Amlarem, Nailar:
Ka Tur Shaphrang Village Organisation (TSVO), Lumpyngngad, Amlarem Block, West Jaiñtia Hills ha ka 27 tarik mynta u bnai ka la rakhe ïa ka lyngkhuh snem kaba nyngkong ha ka jingïalang kaba la long ha Madan Phutbol jong ka shnong.
Hapoh kane ka VO ki don 5 tylli ki SHG kiba ïasnohkti lang ban kyntiew ïa ka roi ka par jong ki nongshong shnong. Kine ki long ka SHG Shaniah tylli, SHG Ïateilang, SHG Ryntihlang, SHG Jukai dei phrang bad ka SHG Khihmon Sngah Jam.
Ha ka jingïalang la don lang u Bah M. Kharpran, Block Project Manager (BPM) Amlarem C&RD Block kum u kongsan bad u Bah Medalin Swer kum u Symbud Kongsan, u Adviser ka VO, u Bah C. Talang uba dei ruh u Waheh Shnong, Lumpyngngad nalor kiwei pat ki ‘riew pawkhmat ka thaiñ.
La ïoh ruh ka jingkren na ki nongkitkam ka VO, kiba kynthup ïa ka Kong Fitby Syrti kaba la ïathuh ïa ka jingïaid lynti ka VO ha kine ki shisnem kynthih.
Ka la ïathuh ba ka VO ka la lah ban pyndep haduh 12 tylli ki kam hapoh kane ka snem, kata naduh ka kam thung dieng, pynkhuid shnong, rakhe sngi laitluid (Independence Day) bad ka jingai jingïarap ïa kiba donkam jingïarap kum haba don ki jingïathoh shongkurim hapoh shnong, ban peit ïa ka bha ka miat bad ka suk ka saiñ hapoh shnong bad kiwei-kiwei ki kam babha.
