Nongstoiñ, 01:
Ka jingbym shimkhia bad pyrkhat lem ïa ka leit ka wan jong ki paidbah da ka kompeni ‘Spica’ kaba pyntrei ïa ka surok two lane na Nongstoiñ-Rambrai-Kyrshai ka la wanrah shisha ïa ka jingsyrtok ha ka leit ka wan bad pynsyllang ruh shi katdei eh ïa ka ïaid ka ïeng jong ki nongleit nongwan kiba ïaid lyngba katei ka surok.
Ym tang kane ka surok, hynrei kiba bun ki surok ha ki bynta jong ka West Khasi Hills ki dei kiba la jot bad sniew bha. Wat la ka la don ka jingud jingnam na ka por sha ka por, hynrei ym i don jingkyrmen satia ba kan don ka jingpynbha ne maramot.
Hato kiei kita ki daw kiba don sha lyndet jong ka jingshah ieh beiñ jong ki surok ha ki bynta jong ka West Khasi Hills? Hato dei namar ka jingbym shimkhia ne leh sting jong ka tnat PWD ne ka jingbym khlaiñ ka pla tyngka ne kiei pat kita ki daw, kiba kum ka tnat ka donkam ban pynshai na ka bynta ka jingïahun lang jong baroh.
Ha kaba ïadei bad katei ka jingeh na ka jinglong jingman katei ka surok kaba dang don hapdeng ka jingshna bad hadien ka jingud jingnam jong ki paidbah, ka FKJGP Rambrai Circle ha ka sngi Ba-ar ka la leit ban buh da ka jingthoh sha u Executive Engineer ka tnat PWD ba un turklar lem ïa katei ka kompeni na ka bynta ba kan pyrkhat lem ïa ka ïaid ka ïeng jong ki paidbah haba ki pyntrei ïa ka surok.
U Bah Jitstar Lyngkhoi, President ka FKJGP Rambrai u la ïathuh ba kumba long mynta na ka jingbym pyrkhat katei ka kompeni ba pyntrei ïa ka surok khamtam ha ki bynta jong ka surok na Lawdihbah – Sohmynthar – Mawrhir, kumjuh ruh ha ki bynta jong ka surok ha Syllang ka la pynlong ïa ki kali ba kin sahkut bad don ruh ba ki hap shu ïa khynñiat hi ïa ki kali tang ban lait na ka ktieh kaba la satah bher bher.
Shuh shuh la ong ruh ba lyngba ka jingbym pyrkhat jong ka kompeni haba pyntrei ïa katei ka surok, kala pynlong ka jingeh ïa ki paidbah khamtam ïa kiba pang ba shitom bad la don ruh kiba la duh noh wat ïa la ka jingim namar katei ka surok.
U la ong ruh ba ka FKJGP kan sa leit ruh ban buh ïa ka jingujor sha u Deputy Commissioner ka West Khasi Hills ba un shimkhia bad tuklar na ka bynta ka jingmyntoi jong ki paidbah ka thaiñ.
