Nongpoh, Nailar 02:
Ka Khasi Students Union (KSU) Nongpoh Circle ryngkat ki spah ngut ki paidbah ka thaiñ Nongpoh ha ka Sngi Balang ki la mih paidbah sha surok ban pynlong da ka jingïaid paidbah kum shi bynta ban pynsngew sha ki bor ba dei khmih ka sorkar halor ka jinglip ba khah-khah jong ka bording ilektrik ha ka thaiñ Ri Bhoi bad khamtam eh ha sor Nongpoh.
Ka jinglip ba khah-khah jong ka bording ilektrik khamtam ha sor Nongpoh na ka por sha ka por, ka la wanrah bad buh jingeh shikatdei ïa ki samla pule, ki ‘riew seng kam seng jam, ki shlem treikam bad ïa ki paidbah hi baroh. Kumta kum ka seng kaba peit ïa ka khia ka shon jong ki paidbah, kam lah ban shu peit tang da ki khmat hynrei ban leh noh da kaba tyngeh nangne shakhmat.
Ha kane ka jingïaid paidbah kaba la sdang na NSCA Stadium Pahamsyiem bad pynkut ha phyllaw ka shlem treikam jong ka MeECL Nongpoh Division. Hadien kata la pynlong ruh ïa ka jingïalang lyngkot kaba la wan ban ai jingkren naduh ki nongïalam shnong, ki nonghikai skul, ki nongïalam jong kiwei ki seng bad ruh na u President jong ka KSU NKHD, u Bah Ferdynald Kevin Kharkamni.
Hadien jong ka jingïalang ba lyngkot, ki nongïalam ka KSU ki la leit ruh ban aiti ïa ka dorkhas sha u Deputy Commissioner ka Ri Bhoi District, hynrei namar ka jingbym don ka jong u ha shlem treikam, ïa ka dorkhas la aiti noh ha u Additional Deputy Commissioner ka Ri Bhoi, u Bah MB Tongper.
Ha katei ka dorkhas, ka seng ka la kdew ba kumba long mynta, ka District ka don tang ïa ka 33/11KV Substation kaba la shim bording na ka Stage III Power Station kaba don ha Kyrdemkulai ha ka jingjngai kaba 40 kilometer tam. Kane ka la wanrah ïa ka jingduh ba khah-khah jong ka bording ilektrik namar ka jinglyngkot jong ki waiar bording bad ka jingtyngkhuh jong ki dieng ki siej.
Halor kane ka bynta, ka seng ka la dawa ba ka sorkar ka dei ban buh noh da ka 132/33 KV Substation ha Nongpoh naba kumba long mynta, u tower line jong ka 132/11KV u la don lypa bad kane kan kham pynsuk bad pynduna jinglut ruh ïa ka tnat MeECL ba kan buh noh da ka 132/33KV Substation ban weng noh ïa kane ka jinglip ba khah-khah jong ka bording ilektrik kaba la ktah shikatdei ïa ki paidbah.
Shuh shuh ki nongïalam ka seng ki la ban ruh ba lada ha kiwei ki District kiba dang shu mih thymmai ruh, ki la ïoh ïa ka 132/33KV Substation, ka Ri Bhoi District kum kawei na ki District kaba la rim bha ha ka jylla, ka la dei hok ruh ban ïoh ïa katei ka Substation bad dawa ba ki bor ba dei khmih jong ka sorkar kin shimkhia halor kane ka bynta.
Kum ban shu pynkynmaw biang, ha u snem 2012, ka Co-ordination Committee on Electricity jong ka Ri Bhoi District, ha kaba ka KSU ruh ka dei kum kawei na ki dkhot ba lamkhmat, ka la dep ban aiti ïa ka dorkhas ban dawa ban buh noh ïa ka 132/33KV Substation sha ki bor pynïaid District ka Ri Bhoi ha kito ki por. Hynrei mynta la shiphew snem tam, ym pat ïohi dak eiei ba ki bor pynïaid District, ka tnat MeECL ne ka sorkar jylla kin shimkhia halor kane ka bynta.
Kumta ha kane ka kynti, na ka liang ka seng ka buh ruh ïa ka jingmaham ba lada ki bor ba dei peit kim leh eiei ban pynurlong ïa kane ka jingdawa, na ka liang ka seng kam banse ban shim syndon da ki sienjam kiba tyngeh wat lada dei ban khang khyrdep noh ïa ka shlem jong ka MeECL Nongpoh Division ruh.
