Nongstoiñ, Nailar:
Ka West Khasi Student Union (WKSU) Sengkmie ha ka Sngi Ba-ar ka la leit ban ïakynduh ïa u Deputy Commissioner (DC) halor ka jinghiar bad ka jingduna jong ka thaiñ West Khasi Hills District katkum ka kaiphod ba la mih na ka NFHS & NITI Aayong 2015-16.
U General Secretary ka WKSU Sengkmie samla Mondaystone Lyngdoh u la ong ba halor katei ka bynta, u DC u la pynpaw ba u la shimkhia ïa kane ka kam bad u la leit buddien ruh dalade ïa ki jaka kiba dang sahdien.
Shuh shuh la ïathuh ruh ba na ka liang u DC u la ai ka jingpynshai ba ka daw kaba pynkylla long ïa ka distrik ban sahdien ka dei ka jingduna ha ka liang ka pule puthi, ka koit ka khiah ki longkmie kha khunlung, ki lynti ki syngkien, ka jingduna ha ki network bad ka jingduna ban link ïa u Adhaar card bad kiwei kiwei.
La ong ruh ba u DC u la ai ka jingpynshai ba ka jingduna ban pynïasoh ïa u Adhaar card ka ai lad ïa ka jingbamsap ha ki shnong ki thaw, ha ki tnat sorkar bad ha kiwei kiwei.
“Ngi wer ïa u paidbah sngewbha ban pynïasoh ïa u Adhaar card lane ban leh ïa u Adhaar card khnang ba shibun ki jingmyntoi jong ki skhim na ka sorkar kmie bad ka sorkar jylla kin sa wan ha ki ïing ki sem jong ki nongshong jong ka thaiñ bad ka jingnang kiew jong ka thaiñ West Khasi Hills kan sa kiew irat biang khamtam ha ka roi ka par bad ha ka ïoh ka kot,” la ong u samla Mondaystone da kaba u la bynrap ban ong ba ka WKSU ha kaba ïadei bad kane ka mat kan nang ïai buddien na ka por sha ka por ban ïatreilang bad ki bor sorkar na bynta ka jingbha jong u paidbah.
