Shillong, Nailar 02:
Ka Sorkar Meghalaya ka la pyntip sha ka Sorkar Pdeng ba ka tnat Directorate of Mineral Resources (DMR) haduh mynta ka khlem pat ïoh jingujor la ka jingtih palat liam ïa u mawshun ha Rilum Jaiñtia ka ktah ne em ïa ka jinglong jingman ka mariang lane la ki don ne em ki kompani shna dewbilat kiba don bynta ban tih be-aiñ ïa u mawshun.
Kane ka la paw ha ka jubab jong u Myntri Sorkar Pdeng ba dei peit ïa ka tnat Mines, Coal bad Parliamentary Affairs, u Pralhad Joshi, ïa ki jingjylli ba la wanrah da u MP ka Rajya Sabha, u Rakesh Sinha, ha ka Dorbar Lyiur jong ka Rajya Sabha ha ka Sngi Ba-Ar.
Na ka liang u Sinha u la kwah ban tip katno u mawshun u don ha Rilum Jaiñtia bad halor kane, u Myntri u la ong ba katkum ka jingai jingtip jong ka sorkar Meghalaya, la antad ba ka jingdon u mawshun ha Rilum Jaiñtia kumba ka long mynta ka long 10,219 Million Ton.
Halor ka jingkylli u MP katno tylli ki kompani shna dewbilat ki don kiba la ïoh laisen ban pyndonkam ïa u mawshun, u Joshi u la ong ba ka sorkar Meghalaya ka la pyntip ba ki don 16 tylli ha Rilum Jaiñtia. (Ïa ki jingtip kiba bniah halor kine ki kompani la ai lang ha kane ka khubor).
Ha kaba ïadei bad ka jingkylli la ka don ne em ka jingtih mawshun be-aiñ da ki kompani shna dewbilat, u Myntri Sorkar Pdeng u la jubab ba haduh mynta, ka tnat DMR ka khlem pat ïoh jingujor eiei ha kaba ïadei bad kata.
Ha kajuh ka por, u Myntri u la ong ba ka tnat DMR ka khlem pat ïoh jingujor la ka jingtih palat liam ïa u mawshun ka don jingktah ne em ïa ka jinglong jingman ka mariang.
