Shillong, Nailar 02:
Ka Meghalaya Public Service Commission (MPSC) kaba dei ka shnat treikam hapoh jong ka Sorkar Jylla ban pynïaid ïa ka jingthungkam ha Jylla, ka la treikam mynta la palat 50 snem khlem ‘Service Rules’ ne ki kyndon na ka bynta ki nongtrei.
Kumta khnang ba ka jingtreikam kan long kaba beit kaba ryntih, ka Kynhun Myntri ha ka sngi Balang, ka 2 tarik Nailar 2023 ka la ai jingmynjur ïa ka ‘Service Rules’ na ka bynta ki nongtrei ka MPSC.
Haba ïathuh ïa kane sha ki lad pathai khubor hadien ka jingïalang jong ka Kynhun Myntri, u Myntri Rangbah Conrad K Sangma u la ong ba ka Kynhun Myntri ka la ai jingmynjur ban don noh ki kyndon la kajong na ka bynta ki nongtrei ka MPSC namar baroh shi katta phew snem, ki kyndon kim don na ka bynta ki nongtrei ka MPSC.
U la ong ha kine ki san snem ba la leit naduh 2018, ki don bun tylli ki tnat treikam ka Sorkar Jylla ki bym pat don Service Rules ha kaba ka Sorkar MDA ka la pynbit pynbiang khnang ba ki nongtrei kin don la kajong ka kyndon treikam.
U Conrad u la ïathuh ba ka Kynhun Myntri ruh ka la ai jingmynjur ruh ban pynkylla katto katne ki bynta hapoh ka aiñ Meghalaya Medical Council Act namar baroh shikatta, ka dang don ka kyntien Medical Council of India hapoh kane ka aiñ, bad mynta ïa ka Medical Council of India la pynkylla sha ka National Medical Commission.
U la ong ba ïa kane ka jingpynkylla ïa ka Meghalaya Medical Council Act la wanrah ba kan treikam shwa da ka Ordinance.
