Shillong, Nailar 02:
U Myntri Rangbah ka Jylla, u la ong ba ka jingpyntreikam ïa ka National Education Policy (NEP) ka dei kaba hap jam shakhmat bad u la kubur ba ki jingeh kin don ha kaba ki jaka pule kin ïakynduh haba sdang ban pyntreikam kum ka jingduna briew (man power) ban hikai, bad ka jingbym pat biang ki jingtei jingshna ha ki jaka pule.
Haba buh jingkylli halor ka jingpyntreikam ïa ka NEP 2020 ha kaba ki samla pule bad ki nonghikai kolej ki dang artatien lada pyntreikam noh mynta, u Conrad u la ong ba kam don ka jingpyrshah ïa ka NEP namar kane kan wanrah shibun ki jingmyntoi ïa ki samla pule bad kan wanrah ruh ka jingkylla.
U Conrad u la ong ruh ba ka NEP kan wanrah ïa ka rukom ai jinghikai kaba janai bad kaba lah ban pynsuk haba ïakynduh jingeh.
Nangta, u la ong ba ki kolej kiba pynïaid da ka Sorkar kin ïoh jingïarap pura. U la kular ba na ka liang ka Sorkar Jylla kan ïaleh katba lah ban noh lem ki lad jingïarap ïa ki kolej kiba pynïaid da ki kynhun shimet kiba donkam ruh ban leh la kajong ka bynta bad trei shitom na ka liang ki bor pynïaid jong ki managing committee jong ki kolej kum ki deficit bad kolej adhoc.
U la ong ruh ba ïa ki kolej adhoc yn mang ïa ka jingïarap kaba kyllum na ka bynta ban pynbiang ïa ki jingdonkam bad ma ki ruh ki don la ka bynta ban leh.
U la ong ruh ka Sorkar ka lah ban ai ki jingïarap, hynrei kam dei pat ka sorkar ka ban leh lut ïa baroh ki jingdonkam haba pyntreikam ïa ka NEP.
Kumta u Myntri Rangbah u la ong ba ka NEP ka dei kaba hap jam shakhmat bad khlem pep ki don beit ki jingeh kiba hap ban ïakynduh haba pyntreikam ïa ka policy.
Kumba ka long mynta, ki samla pule lem bad ka synjuk ki nonghikai kolej hapoh ka shatri jong ka Meghalaya College Teachers’ Association ki la ïeng pyrshah ïa ka rai kaba pynbna da u Vice Chancellor ka NEHU ban sdang pyntreikam ïa ka NEP naduh mynta.
U Conrad u la ong ba kane ka dei ka bynta kaba ka NEHU ka hap ban ïakren bad ïasyllok bad baroh kiba dei ki nongdon bynta haba ïadei bad ka jingpyntreikam ïa ka NEP.
