Jowai, Nailar 02:
Ka Jaiñtia Hills Truck Owner Association (JHTOA) sa shisien ka la maham da kaba tyngeh pyrshah ïa ki trok 18 shaka ba kin kit ïa kino-kino ki mar kum u ‘cement clinker’ bad kiwei pat napoh Ri-lum Jaiñtia.
Ka seng ka pynkynmaw biang na ka por sha ka por naduh ki 2015 ter ter haduh mynta u snem (2023) ban khang pyrshah ïa ki trok ‘18 Tyre Trailer’ ban kit ïa ki mar na ka thaiñ kum u ‘Cement Clinker’ napoh Ri-lum Jaiñtia namar lada ailad kan pynduh kam ïa ki trok kamai jong ki trai ri trai muluk.
Ha ka kyrwoh lyngba u Bah Biangshwa Shylla, President ka seng, la ong ruh ba kane ka jingailad ïa kine ki trok 18 shaka ba kin kit mar beit na ki karkhana ne factory, kin thied kum kine ki jait kali 18 shaka bad ki kali na shabar ka jylla kin wan kit beit na ki karkhana, ha ka jaka ba kin pynkit ne thep na Byrni bad kane kan ktah jur ïa ka kamai kajih jong ki trai jylla khamtam ïa kiba buh ïa ki trok kamai.
Nalor kata, ka seng ka la ong ruh ba lada shah ïa kine ki kali 18 shaka, ka jingdheng kali kan long kaba jur bha hapoh Ri-lum Jaiñtia hi baroh kawei. Kawei ruh ka long namar ki lynti surok ruh kim pat ïahap bad kine ki kali ba kin kamai sha kane ka thaiñ.
Shuh shuh ka seng ka la ong ba lada kine ki kali 18 shaka kin thep dewbilat ne ki clinker da ki 100 tylli ha ka shisngi kan don ka jingktah kaba jur ïa ki paidbah ki khynnah skul bad ki nongleit nongwan khamtam ïa ki kali kiba kit ïa kiba pang ba shitom.
Kumta na ka liang ka seng ka kyrpad biang ïa baroh ki trai trok ‘trailer’ kumjuh ruh ki nongpynïaid ïa kine ki trok 18 shaka ba kin ïatreilang bad ka seng khnang ba kan ym wanrah ïa kino-kino ki jingeh.
