Shillong, Nailar 02:
Ka Khasi Students’ Union (KSU), WJHDU ka la maham tyngeh ïa ki kaikhlaw kiba thmu ban ïuh-roit ïa ka hok ka kynti jong ki paid Khasi-Pnar kiba shong ba sah ha Block-I.
“Hadien ka jingmih khubor ba ka don ka kynhun kieng atiar ba tip kum ka United People’s Front of Karbi Longri (UPFKL) kaba thmu ban pyntieng pynsmiej ïa ki Khasi-Pnar kiba shong ba sah ha la ki jong ki jaka ki puta kiba don ha Block-I, ka seng ka phah ka kyrwoh khubor sha ki paradoh-parasnam kiba don ha kitei ki jaka bad sha baroh kiba shong ba sah markhap bad ka Assam ba kim dei ban tieng bad ban shongsyier namar ka seng kan long kaba la kloi ban ai ïa ka jubab ïa kita ki kaikhlaw kiba thmu ban wanrah ka jingpyntieng bad ban ïuh roit ïa ka hok ka kynti ki paid Khasi kiba don ha Block-I,” la ong u Publicity Secretary ka KSU-WJHDU, samla Juhhi Tariang ha ka kyrwoh khubor.
Ka Seng ka kyntu ruh ïa ki paradoh-parasnam ban kin ïaid kin ïeng kumba ju long baroh shi katta bad ban kamai kajih laitluid ha la ka jong ka khyndew.
“Ka Seng ka maham ïa kata ka seng kaikhlaw kaba tip kum ka UPFKL ba lada ka kwah ban ïatyngkhuh, ka seng ka la long kaba la pynkhreh ban ïa mih ha madan thma bad lada jia eiei ïa ki doh ki snam jong ngi kiba shong ha kitei ki jaka, ka Sorkar Assam bad Sorkar Meghalaya ki dei ban shim ka jingkitkhlieh,” la ong ka kyrwoh na utei u nongïalam.
