Shillong, Nailar 02:
Ka Meghalaya Lokayukta ka la mudui lane ‘chargesheet’ ïa 12 ngut ki briew ha kaba ïadei bad ka jingtei ïa ka jaka shong jaka sah ki MDC ka Garo Hills Autonomous District Council (GHADC) bad uwei na kiba la shah mudui u dei u MLA ka NPP na Mahendraganj konstitwensi, u Sanjay A. Sangma, uba dei ruh u kynum trai jong u Myntri Rangbah, u Conrad K Sangma.
Ka jingshah mudui kitei ki 12 ngut ba kynthup ïa 9 ngut ki MDC barim ka GHADC, arngut ki kontraktor, ha kaba uwei na ki u dei u Sanjay A Sangma, bad uwei u Secretary ka GHADC, ka la long ha ka 28 tarik Naitung, 2023 lyngba ka hukum u Shongknor ka Meghalaya Lokayukta, u Bah Bhalang Dhar.
Kiba la shah mudui ki long u Denang T. Sangma, CEM barim ka GHADC, bad ki MDC barim – Augustine R. Marak, Brilliant R. Sangma, Dipul R. Marak, Kurosh M. Marak, Winninson Ch. Marak, Dolly K. Sangma, Bhupen Hajong, bad u Sukaram K. Sangma.
Nalor u Sanjay A. Sangma, sa uwei pat u kontraktor uba la shah mudui u dei uba la tip kyrteng kum u Dolrich D. Sangma. U Secretary ka GHADC uba la shah mudui u dei uba la ithuh kum u Hewingson A. Sangma.
Katkum ka hukum jong ka Lokayukta, kitei ki 12 ngut ki la shah mudui hapoh ki kyndon 12 bad 13 jong ka Prevention of Corruption Act, 1988.
Ka rai ban mudui ïa kitei ki 12 ngut ka long hadien ba ka Lokayukta ka la ïoh pdiang ïa ka kaiphod jong ka jingtohkit na u Anil Sangma, u ophisar MPS ba la shongthait, bad uba long ruh u dkhot ka ‘Inquiry Wing’ jong ka Meghalaya Lokayukta.
Haba pynmih ïa ka hukum, u Bah Dhar u la bthah ïa u Director ka Prosecution ba un aiti lut ïa ki kot ki sla kiba ïadei bad kane ka kam sha u muktiar jong ka sorkar (Public Prosecutor) ka West Garo Hills, Tura, khnang ba ka jingbishar kan sdang ha ka ïingbishar bakyrpang lane ‘Special Court’ ha Tura.
Ka rai pyrshah ïa kitei ki 12 ngut ka long na ka jingujor jong uwei u nongshong shnong uba la tip kyrteng kum u Kingstone Bolwari Sangma ha u snem 2021.
Ha u kyrwoh khubor, u Kingstone u la ïathuh ba ka jingrai ban mudui ïa kitei ki 12 ngut ka dei halor ka kaiphod jong u Anil Sangma.
U la ïathuh ba u la ujor sha ka Lokayukta pyrshah ïa u Sanjay A Sangma bad kiwei (Case No. 5 jong u snem 2021) halor ka jingbym pyndep ïa ka jingshna ïa ka ‘Hostel’ lane ka jaka sah jong ki MDC ka GHADC ha Tura. Ka jingmang pisa ïa kane ka jingtei ka long haduh T. 6,01,31,100, la ong u Kingstone.
Shuh shuh u la ong ba kane ka pisa (T. 6,01,31,100) ka dei ka bynta jong ka Special Assistance na ka Sorkar Pdeng sha ka GHADC jong u snem 2015-16. Ha u 2015-16, u Kingstone u la ong ba ka tnat pla tyngka jong ka Sorkar Pdeng ka la mang T.100.71 klur kum ka jingïarap bakyrpang lane Special Assistance ïa ka GHADC ban kyntiew ïa ki shnong ki thaw kiba shong ba sah ki riewlum.
Ha kaba nyngkong, u Kingstone u la ïathuh ba ka Lokayukta ka la pynlong ïa ka jingtohkit kaba malu-mala, hynrei na kata, la lap ba ka don eiei ka bym biang ha kaba ïadei bad ka jingpyndonkam ïa katei ka pisa ban shna ïa ka jaka sah ki MDC ka GHADC.
Namarkata, u la ong ba ka Lokayukta ka la aiti ha u Anil Sangma ba un pynlong da ka jingtohkit kaba bniah, bad hadien ba u la aiti ïa ka kaiphod, ka Lokayukta ka la rai ban mudui syndon ïa kitei ki 12 ngut.
U Kingstone u la pyntip ruh ba u Anil Sangma u la dep ban aiti ïa ka jingmudui bad ka kaiphod jong ka jingtohkit sha ka ïingbishar bakyrpang ha Tura. Kane ka ïingbishar ka la pdiang ïa kita bad ka la pynrung ruh ïa ka ‘case’. U la ong ba ka ïingbishar ka la buh ïa ka 29 tarik Nailar, 2023 kum ka sngi ba kitei ki nongshah mudui kin hap ban wan mih.
