Shillong, Nailar 02:
Hadien ba u Vice-Chancellor (VC) ka North Eastern Hill University (NEHU), u Prof. P.S. Shukla u la pynpaw ïa ka jinglong ba la kloi ban ïakren bad ka Meghalaya College Teachers’ Association (MCTA), ka seng ka la pynsngew ba kan sa lum ïa ka jingïalang ba kyrkieh mynta ka taïew ban ïapyrkhat halor katei ka bynta.
“Ïa mynta ngim pat pynsangeh ïa ka jingïakhih. Ngim pat shim kano-kano ka rai,” la ong u General Secretary ka MCTA, Dr. A.W. Rani.
U la ong ruh ba ka seng kan sa khot ïa ka jingïalang ba kyrkieh ban shim ïa ka rai haba ïadei bad katei ka bynta.
“Ngan sa pynsngew sha ka President bad hapoh kane u taïew ngin sa lum ïa ka jingïalang ba kyrkieh bad ngin sa rai la ngin pynsangeh noh ïa ka jingïakhih ne ngin pyrkhat da kumwei pat,” u la ong.
Kum ban shu kdew hangne, ka MCTA – ka seng ki nonghikai kolej ha ka Jylla ka la shim ïa ka rai ban ym ïatreilang shuh bad ka skulbah (NEHU) ha ka jingpynjari ïa ka National Education Policy-2020 ha ki kolej.
Halor katei, ka seng ka la hukum ïa baroh ki dkhot jong ka ba kim dei ban shim ïa ki klas jong ka ‘First Semester’ ha baroh ki sobjek naduh ka 1 tarik Nailar, 2023. Ha kajuh ka por, ki dkhot kim dei ban shim kano-kano ka kam haba ïadei bad ka jingpyntreikam ïa ka NEP tat haduh ban da pynbna da kumwei pat.
Ha kawei ka liang, ka seng ka la kdew shai ba ka jingtrei bad jingshim ïa kiwei pat ki klas katkum ka rukom long kaba rim kan ïaid beit kumba ju long bad kyntu ïa kiwei pat ki nonghikai ki bym dei ki dkhot jong seng ban kin ai ka jingkyrshan ha kane ka kynti.
Kumba ka long mynta, ka jingïakhih jong ka MCTA ka la ïaid mynta la 2 sngi.
U VC ka NEHU, u Prof. P.S. Shukla ha ka Sngi Ba-ar u la pynpaw ïa ka jinglong kloi jong u ban ïakynduh ïa ka MCTA kumjuh ban wan ka lad ka lynti lyngba ka jingïasngewthuh jingmut halor ki jingeh kiba don hakhmat jong ki.
Ka jingpynmih hukum jong ka NEHU ban pyntreikam noh ïa ka NEP-2020 naduh ka samoi pule 2023-2024 ka la pynkulmar jingmut ïa uba bun balang khamtam ïa ki nonghikai bad ki samla pule kiba la pynpaw ïa ka jingsngew ba katei ka jingshim rai jong ka skulbah ka long kaba hak-dak bad kaba la leh khlem da pyrkhat.
