Shillong, Nailar 02:
U Myntri ba khmih ïa ka tnat Animal Husbandry and Veterinary, Bah A.L Hek, ha ka Sngi Balang u la pyntip ba u la dep ban shimkhia bad ban ïakren bad ka Sorkar Assam ban ailad bad pyllait ïa ka jingwanrah ïa ki masi shapoh ka Meghalaya.
“Ngi la dep ban shimkhia ha kaba ïadei bad kane ka kam bad ka Sorkar Assam. Na ka liang jong nga, nga la dep ruh ban ïakynduh ïa u Myntri ka tnat Animal Husbandry ka Assam ha nongbah Guwahati. Nga la kren sha u ba kine ki masi kiba wan sha Meghalaya, ki dei kiba wan lyngba ka surokbah (National Highway),” la ong u Bah Hek.
Kane ka jingshimkhia jong u Myntri ka Sorkar Jylla ka la long hadien ba ki nongkhaïi masi napoh ka Meghalaya dang shen ki la shah bat noh ha Assam, namar ka jingshalan ne wanrah ïa ki masi.
“Hooid ka sorkar Assam ka la khang ban shalan ïa ki masi hapoh ka jylla jong nga, hynrei ki nongkhaïi jong ngi, ki la pyndonkam da ka surokbah (national highway) ym da ki surok jong ka jylla. Ka surokbah ne National Highway ka dei na ka bynta jong baroh. Wat hapoh Meghalaya, ka surokbah kam dei satia ka surok jong ka jylla,” u la ong.
“Kumta, phim lah satia ban ong ba phim lah ban rah ne kit ïa kine bad dei tang lada ka la don ka jingkhang ïa ka surokbah, te ka lah ban long ne mih da kumwei, hynrei kam don satia kum kata, bad kumta ym lah ban khang, haba ïaid lyngba ki surokbah,” la ong u Bah Hek.
