Shillong, Nailar 02:
U MLA bad MDC barim ka Mawlai konstitwensi, Bah Embhah Syiemlieh u la rai ban kyrshan beit ïa u Bah Teibor Pathaw lada u dang ïakhun ïa ka ilekshon MDC na ka seng NPP na Mawlai.
Kum ban shu pynkynmaw u Bah Embhah u la mih na ka seng UDP ban leit pynïasoh sha ka NPP ban kyrshan ïa u Bah Teibor Pathaw ha kane ka ilekshon MLA ha u snem 2023 da ka jingthmu ba un ïakhun hi ïa ka ilekshon MDC ha u snem 2024. Hynrei, namar ba u Bah Teibor u khlem jop ha ka ilekshon MLA, u hap ban ïakhun biang ïa ka ilekshon MDC na Mawlai konstitwensi.
Haba ïakren bad u Bah Embhah u la ïathuh ba un dang kyrshan ïa u Bah Teibor lada u dang ïakhun ïa ka ilekshon MDC na Mawlai konstitwensi na ka seng NPP namar u dang dei u MDC ba mynta.
“Ka la don ka jingthmu ba ngan ïakhun ïa ka ilekshon MDC lada u Bah Teibor u jop ha kane ka ilekshon MLA. Namar u khlem poi sha ka thong, kumta u hap ban bteng biang ban ïakhun na ka seng NPP bad ngan kyrshan beit ïa u” la ong Bah Embhah.
Namar kata, u Bah Embhah u don jingkyrmen ba ki paidbah kin ai jingkyrshan ïa u Bah Teibor ha kane ka ilekshon MDC na Mawlai konstitwensi.
