Shillong, Naitung 02:
Ar ngut ki nongkhaïi ‘Ganja’ ki la ngat ha kti jong ki pulit ka Phulbari ha kaba na kine la ïoh ban kurup kumba 700 gram u ganja bad ruh ka pisa kaba long haduh T.67,000.
Katkum ka khubor na ki pulit, la ong ba ki pulit hadien ka jingïoh khubor halor kine ki ar ngut, ki la pynlong ïa ka jingkhynra ïa ka ïingsah jong uwei u briew ba kyrteng u Fozidur Islam ha Khaprabari ha ka 1 tarik Nailar. Ha kane ka jingkhynra ki la ïoh kurup haduh 227 gram u ganja.
Shuh shuh la ong ba hadien ka jingïoh kem ïa u Fozidur bad da ka jingïalam lynti ka jong u, ki pulit ki la leit ban khynra sa ïa ka ïingsah jong uwei pat u briew ba kyrteng kum u Mominur Islam bad nangne ruh ki la ïoh kurup haduh 472 gram u ganja.
Na kine arngut, ki pulit ki la ïoh kurup haduh 700 gram u ganja, ka pisa ba T.66,970, artylli ki mobile phone bad ka SBI ATM Card. Ïa kine arngut la pynrung case ha thanat Phulbari bad la pynngat ruh hapoh ka kyndon 20(b)(ii)(A)/25/29, NDPS Act, 1985.
