Shillong, Nailar 02:
Ka Sorkar Jylla ka dang pynkhreh mynta ban ïakhun na ka bynta ban pynlong ïa ka kad liengsuiñ ha Umroi kum ka International Airport lane ka kad liengsuiñ kaba ïasoh bad kiwei ki ri, ha kaba ka jingpynkhreh ka dang ïaid shaid-shaid.
Ka tyllong khubor ka ïathuh ban ithuh ïa ka kad liengsuiñ kum kata kad liengsuiñ kaba pynïasoh bad kiwei ki ri ka dei lyngba ka tnat Civil Aviation jong ka Sorkar Pdeng.
Haba phai sha ki lad ba ka Meghalaya ka lah ban pynïasoh bad kiwei ki ri ba marjan lyngba ka liengsuiñ, ka dei tang ka Bangladesh kaba kham suk bad khamjan, bad lada ka urlong, lehse yn sdang shwa da ki liengsuiñ kiba kham rit, ym da kiba heh.
“Lyngba ka jingkiew ki kam jngohkai pyrthei bad ka jingdon ki kam khaïi bad ka Bangladesh kan ïarap ban wanrah ka jingpynïasoh lyngba ka liengsuiñ,” la ong ka tyllong khubor.
Haba kylli, haduh lano kan shimpor ban ïakhun bad pynurlong ïa kane, ka tyllong khubor ka ïathuh ba mynta ka dei ka jingpynkhreh kaba lah ban shimpor, hynrei lehse ha kine ki khyndiat snem yn sa lah ban pynurlong.
Haba kylli la ka jingpynïasoh lyngba ka liengsuiñ na Meghalaya sha Singapore ne Thailand, ka tyllong khubor ka ïathuh ba kam long kaba suk ban pynbiang ïa ki liengsuiñ namar kano-kano ka lynti ba ki liengsuiñ kin her, ka dei katkum ka jingbiang ka jingkamai, bad ka jingdon ki nongleit nongwan.
“Lada ïakren ïa kaba, ka Bangladesh ka dei kaba hakhmat eh, kaba lah ban pynurlong,” la bynrap ka tyllong khubor.
Ka kad liengsuiñ ha Umroi ka dei kaba dang rit bad ka bym pat biang lut ki jingdonkam naduh ban her bad ban hiar ki liengsuiñ kiba heh khamtam lada pynïasoh bad kiwei ki ri.
Ki kam ban pynheh ïa ka kad liengsuiñ ka dang bteng haduh mynta, bad ym pat lah ban pyndep.
