Los Angeles:
Ka Kylie Jenner ka la snohkti bad ka Bratz ban pynmih ia ki khun mynriew kiba ha ka dur jong ka ha kaba ia kine ki khun mynriew yn sa pynriam pynbeit da ki riam kiba ka Kylie ka la phong sha ki jaka ba ka leit shim bynta.
Kine ki khun mynriew kiba yn shna bad pynmih kin don haduh 6 tylli bad ka Bratz ka long ruh ka kompani kaba la dep ban pynmih teng ia ki khun mynriew kiba ha ka dur ka dar jong ki nongrwai bad ha kajuh ka por jong ki Model bad khlur ak phlim.
Ia kine ki khun mynriew kiba yn shna bad pynmih yn ai kyrteng da Mini Bratz x Kylie Collectibles bad yn pynriam pynbeit ia kine ki khun mynriew ha kata ka rukom khnang ba kin khring ia ki khynnah ba kin kwah ban thied ia ki.
Ha kaba iadei bad ki riam kiba yn pynphong na ka bynta kine ki khun mynriew kin kynthup ruh ia kawei kaba la phong da ka Kylie ha ka jingleit shim bynta sha ka 2022 Met Gala, 2019 Met Gala bad kiwei kiwei.
Ia ki Mini Bratz x Kylie Collectibles yn sa die lyngba ka Walmart, Amazon, Target, Macy’s bad Walgreens stores. Ka Kylie ka kwah ba ia kine ki khun mynriew ha shwa ban die paidbah ia ki yn pyni shwa ha ka khun kynthei jong ka ka Stormi kaba ju sngewtynnad bad kaba ju lum ruh ia ki khun mynriew kiba hap rukom ban buh kai na ka bynta ban sah kynmaw.
