Shillong, Nailar 02:
Ki paidbah kiba shong die jingdie ha khlieh ïew ki la ud la nam shikatdei eh namar ka jingsma bad ka jingjaboh kaba la pyntuid da ki nongdie dohsyiar kiba la ot bad pyntuid ïa ka snam bad ka snep syiar lyngba ki dukan jong kitei ki nongshong die jingdie kiba don ter ter ha kitei ki thaiñ.
Na ka liang ki nongshong dukan kiba die jingdie ha kitei ki thaiñ ki la ïathuh ïa ka jinglong jingman jong katei ka jaka ha kaba ki la ong ba barabor ki nongshong die dohsyiar na khlieh ïew, ki ju pynkhuid ïa ki syiar hangtei bad ki la pyntuid ïa ka snam kaba jaboh jabaiñ bad ka snier syiar sharum. Kane ka la wanrah ka jingsma kaba haduh katta katta ïa katei ka jaka haduh ba ka la pynlong ïa ki ba kin ym neh ban shong naduh mynstep haduh mynmiet namar katei ka jaka ka la shu sma iwtung beit.
Kitei ki nongshong die jingdie ki la ïathuh ba katei ka jingsma ka dei kaba wan na ki dukan kiba pynkhuid ïa ki syiar bad ka snam kaba pynkhuid da kitei ki dukan die doh syiar ka la wan ban tuid beit sha kitei ki dukan kiba shong kham sharum bad kitei ki nongdie syiar kim ju pynkhuid lane kim ju theh um satia ïa katei ka jaka hynrei ki la shu ieh beit hangto kaba la wanrah ka jingsahkut ha ki nala bad jingsma iwtung kaba haduh katta katta haduh ban bam eiei ruh ym nud shuh.
Kitei ki nongshong die jingdie ha katei ka jaka ki la ïathuh ba wat lada na ka liang jong ki, ki la ïakren bad kitei ki nongdie syiar halor katei ka jingsma hynrei kitei ki nongdie dohsyiar kim shah shkor bad kim pynsngap lem ïa kitei ki nongdie jingdie kiba shong kham sharum.
Na ka liang kitei ki nongdie dukan kiba don ha kitei ki jaka ki la ïathuh ruh ba na ka liang jong ki, ki la leit ban buh da ka jingthoh sha u Syiem mynta la ar bnai eiei hynrei haduh mynta ym shym la don satia kaei kaei ka ban leh halor kane. Na ka liang u Syiem ruh um pat jubab eiei halor kane bad ki la ong ba lada ka ïew ka hat ka sma bad ka jaboh kumne, ka bam ka dih kam shngaiñ bad kam bha shuh satia ban bam.
“Ngi la ju ud ha ki pulit Syiem bad hangtei hapoh thanat ngi la ju leit ong hynrei kam ju da kham treikam namar ba kim sngap ïa ka jingong jong ngi ïa ki”, la ong kitei ki nongdie jingdie.
Shuh shuh kitei ki nongshong die jingdie ki la ong ba tang shu wan katei ka jingsma kim lah shuh ban bam ban dih, hynrei la dap lyer. Ki la ïathuh ba tang shu mih ka snam bad ka snep syiar naneng ka la wanrah ïa ka jingsma. Hynrei lada kam mih, kam ju don satia kata ka jingsma bad ynda la dei ka por slap lei katei ka snam syiar ka tuid bad baroh kiba shong dukan ha kitei ki jaka ki sma lut bad ka la pynthut ruh ïa kiba leit ba wan lyngba katei ka lynti.
