Nongstoiñ, Nailar 02:
Wat hadien 21 snem jong ka jingïaid lynti, hynrei kaba sngew lyngngoh ka long ba ka jingtei ïa ka jingkieng lyngba ka wah Phodthre kaba na shlem treikam ka tnat Irrigation sha Mawrusyiar Tiehsaw, ka la shu sahkut kumto khlem da lah ban trei pyndep satia.
Lah ban kdew hangne ba kane jingkieng ka don ïa ka jingjrong haduh 18.75 meter kaba la dep mang pisa da ka Sorkar naduh ka por ba pynlong ïa ka jingïaseng KJP Assembly kaba nyngkong kaba la long ha ka Balang Presbyterian New Nongstoiñ. Pynban kaba sngewsih ka long ba haduh mynta la ïoh ban sakhi ba la pynïeng tang uwei u paia sha shiliang ka wah.
Katei ka jingkieng ka don ruh ha ki bynta jong ka sor Nongstoiñ bad kan ïarap shibun ha ka ban pynïasoh ïa ki shnong kum ka Upper New Nongstoiñ, Tiehsaw, Mawrusyiar bad New Nongstoiñ, kan ïarap ruh ban pyllait ïa ka jingdheng kali hapoh sor Nongstoiñ. Nalor kata, kan ïarap ruh ïa ki khynnah kiba leit skul ha kitei ki bynta khamtam ïa ki khynnah skul na ki shnong Porsohsat, Pyndenglawar, Nongsohpian, Nongritong, Mawkawah, Khliehmawlieh, Mawrusyiar, Tiehsaw bad Upper New Nongstoiñ nalor ki jingdonkam ba man ka sngi.
Hynrei kumba ka paw mynta, imat kane ka jingangnud jong ki paid nongshong shnong kan dang sah ha suiñ namar ym i don dak eiei satia ba ka kam kan ïaid shakhmat.
Ha kaba ïadei bad ka jingsahkut jong ka jingtrei, ka Federation of Khasi Jaiñtia & Garo People (FKJGP) Nongstoiñ Circle ha ka sngi Balang ka la hiar ban leit jurip.
U Disciplinary Secretary ka FKJGP Nongstoiñ Circle u Bah Agilestar Dkhar u la ong, ka FKJGP ka pynpaw ïa ka jingsngewkhia kaba jur halor ka jingbym pat lah pyndep ban shna ïa ka jingkieng da ka ophis u Executive Engineer, PWD (Rd) Nongstoiñ Division, ha kaba ha ka jingshisha la khmih lynti bha ba kane ka jingkieng ka la dei ban kynthup lang ha ka Town Road kaba la mang kyrpang kaba la pyntrei ïa ka Town Nongstoiñ, hynrei sngewsih kam shym la hap satia.
Shuh shuh u la ïathuh ruh ba ka FKJGP ha kaba ïadei bad katei ka jingkieng ka la dep ruh ban phah da ka jingthoh bunsien sha u Executive Engineer PWD (Rd), Nongstoiñ Division, West Khasi Hills District bad kumjuh ruh sha u Chief Engineer PWD (Rd), Shillong na ka por sha ka por. Katkum ka jingïakynduh jong ka seng, la ïoh jingtip ba la phah ïa ka ‘revise estimate’ sha ka ophis jong u Secretary ka sorkar jylla uba dei peit ïa ka tnat PWD (R&B).
Ym tang katta, ka seng ka la phah ruh ïa ka jingthoh sha u Secretary jong ka sorkar jylla uba dei peit ïa ka tnat PWD (R&B), hynrei haduh mynta ym pat don dak don shin ban sdang pyntrei biang ïa katei ka jingkieng, hynrei kaba sngewsih imat ba kim treh shuh ban pyndep ne tei pat ïa katei ka jingkieng wat la ka donkam eh.
Kumta na ka liang ka FKJGP ka dawa ïa ka tnat ba dei peit jong ka sorkar ba ka dei ban pyndep noh mardor ïa katei ka jingkieng.
