Shillong, Nailar 02:
U MDC ba mynta jong ka NPP na Mawsynram konstitwensi, Bah Alvin Sawkmie u lah ban khot jingïalang ïa ki nongkitkam ka NPP Mawsynram Block ha kine ki sngi ban ïakren halor ka jingmih ki khubor ba thmu rung NPP noh u MLA barim katei ka konstitwensi, Bah HM Shangpliang.
Kane ka jingkhot jingïalang u Bah Alvin ïa ki nongkitkam ka NPP ka long ban ïakren la kin pdiang ne kin kyntait lada wan u Bah Shangpliang. Pynban shwa ban shim rai kin sa ïakren sani bad ki nongkitkam ka NPP Sengkmie.
Ki khubor kiba mih ha kine ki sngi ki ïathuh ba ki nongkitkam jong ka BJP Mawsynram Mandal, East Khasi Hills District ki lah ban leit pynïasoh noh sha ka NPP ha Mawsynram katba ka jingïakren ki nongïalam ka NPP Sengkmie bad u Bah Shangpliang ka dang ïaid ba un ïakhun ïa ka ilekshon MP Lok Sabha na Shillong konstitwensi na ka NPP.
Nangta, ki khubor ki ïathuh ruh ba lada u Bah Shangpliang bad ki nongkitkam ki rung noh sha ka NPP kin kyrshan beit ïa u Bah Alvin ha ka ilekshon MDC na Mawsynram, lada jia ba ka NPP kan pynïeng ïa u Bah Shangpliang kum u kyrtong ka NPP ha ka ilekshon MP Lok Sabha.
Haba pyrshang ban ïakren bad ki nongïalam ka NPP halor kane ka khubor kim pat treh ban ïakren namar kane ka jingïakren bad u Bah Shangpliang ka dang don ha ka lynti.
Kum ban shu pynkynmaw u Bah Shangpliang u dei u ophisar rangbah (IAS) uba la shongthait ha ka sorkar jylla. U la jop ïa ka ilekshon MLA na Mawsynram na ka seng Congress. Pynban kham hadien katto katne por u la mih lang noh bad ki paralok MLA hapoh ka jingïalam u Dr. Mukul Sangma ban pynïasoh sha ka seng TMC hadien ba ka don ka jingïapher jingmut ha ka Congress.
Ha ka ilekshon MLA ha u 2023 u la ïakhun na ka tiket BJP na Mawsynram bad u la shah rem noh.
Hadien ba u la shah rem ha ka ilekshon, ka sorkar jylla ka la thung ïa u kum u nongaibuit jong ka tnad pule puthi bad nangne ka la sdang ka jingïadei hapdeng jong u (Bah Shangpliang) bad ki nongïalam ka NPP.
