Shillong, Nailar 03:
Ka Catholic Association of Shillong (CAS) ka la rai ban ujor sha ka President ka Ri India halor ka jingjia ha Manipur hadien ka jingpynlong ïa ka jingïaid paidbah na ka bynta ka jingsuk ha ka 5 tarik Nailar ha ka nongbah.
Haba kren sha ki lad pathai khubor ha ka Sngi Palei, u President ka CAS, u Bah John A. Lyngdoh, u la kyrpad ïa baroh ki nongshong shnong ban ïasnohkti bad ban ïa wan sha katei ka jingïaid paidbah kaba jar-jar kum shi bynta ban kyntu ban pynkut noh ïa ka jingïakynad jaitbynriew ha Manipur.
Ka jingïaid paidbah kan sdang na Madan Ïewrynghep ha ka por 10 baje mynstep bad kan kut ha Don Bosco Stadium.
Hadien ka jingpynlong ïa katei ka jingïaid paidbah, ka CAS kan thoh da ka shithi sha ka President ka Ri India ban kyntu ba kan pynleit jingmut sha ka jinglong jingman ha Manipur naba ka jingïakynad ka la kot sha ka lai bnai. Ïa kane ka shithi yn sa phah lyngba u Lat ka jylla.
U Bah Lyngdoh u la ong ba baroh ki lah ban wan ïashim bynta ha katei ka jingïaid paidbah. Hynrei la kyntu ïa ki nongwan ïashim bynta ba kin kiar na ka jingrah ïa ki jingthoh kiba pynshit. Yn khang ruh ïa ka jingpyrta shla kiba lah ban wanrah pynban ïa ka jingpynshit.
Kito kiba kwah ban leit ïashim bynta ha katei ka jingïaid paidbah ki lah ban buh kali ha phyllaw jong ka St. Edmund’s School, St. Edmund’s College, Mareau Institute of Integral Training (MIIT), Brookdene, Loreto School Compound, Cathedral Compound (football ground bad main ground), Christ King College, St. Anthony’s College, Shillong, St. Mary’s Compound, St. Margaret’s school Compound bad kiwei ki jaka ba la pynbeit da ki pulit pynïaid kali.
Ha kine ki lai bnai naduh ba la sdang ka jingïakynad ha Manipur ha ka 3 tarik Jymmang, ka CAS ka la ong ba palat 50,000 ngut ki briew ki la kylla phet wir, palat 10,000 tylli ki ïing ki la shah pynjulor, bad palat 500 tylli ki jaka mane blei kiba la shah thombor.
“Da ki spah ngut ki briew ki la khlad na katei ka jingïakynad kaba la ktah jur ïa kito kiba pang, ki tymmen ki kro, ki khynnah bad ki kynthei. Ki kynthei ki la shah leh khlem akor bad shah pynïaid lyngkhuit ruh,” la ong ka CAS.
Ka la ong ba ki kam ïakynad jaitbynriew ha ki jylla ka thaiñ Shatei Lam Mihngi kim dei satia kiba dang thymmai, hynrei ka CAS ka la ong ba ka jingïakynad kaba mynta ha Manipur ka la tam lut ïa baroh ki jait jingïakynad ha kane ka thaiñ.
“Ngi la duwai na ka bynta ka jingsuk bad jingjai-jai hapdeng ki jingïakynad. Ngi la lum synñiang bad ngi la phah lyngba ki NGO bad kiwei ki seng ban ïarap ïa ki lanot ha Manipur,” la ong ka CAS.
Hynrei ka la ong ba ka por ka la dei ba ki paidbah kim dei shuh ban shu shong peit kai. “Ngin hap ban kren pyrshah ïa ka jingïasniew, jingïaisih para briew, bad ki kam thombor bad pynïap. Ngi dei ban ïa burom para briew bad ban pyrshang ban im hapdeng ka jingsuk bad ki para marjan. Ka jingïaisih para briew bad jingïaumsnam kan wanrah tang ïa ka jingduh suda. Namarkata, ngi kyntu ïa baroh ki kynhun ha Manipur ban wan lang ha kajuh ka sem bad ban ïakren kumno ban lait na kine ki kam ïakynad. Ai ba ki nongïalam kin ïakynduh bad ban sdang ka jingïakren. Ngi ngeit ba kane kan long ka jingsdang. Ngi donkam bad ngi kwah ïa ka jingsuk,” la ong ka CAS.
