Shillong, Nailar 03:
Ka jingleh donbor bad ka jingshah thombor ki paid Khasi ha ki paid Karbi ha Block-1 ka la long kaba na ka por sha ka por. Ha kane ka sien kaba mynta ruh ki paid Karbi kiba la kam ïalade ba ki dei ki kynhun sengbhalang bapher bapher hapoh Karbi Anglong District, ki la byrngem byrsit ïa ki khynnah samla Khasi hapoh ïew hapoh hat da kaba pyntieng pynsmiej ba kim dei ban seng kano-kano ka kynhun sengbhalang hapoh u pud u sam jong ka Block-1.
Ha kaba ïadei bad kane, na ka liang ka Jaiñtia Student’s Union (JSU) Sengkmie ha ka Sngi Palei ka la leit ban ïakynduh bad ban aiti da ka dorkhas ha ka Myntri ka tnad ka sorkar jylla, ka Dr Mazel Ampareen Lyngdoh bad ha u Myntri Rangbah ka jylla, u Conrad K Sangma halor kane ka jingbyrngem byrsit jong ki paid Karbi.
Haba kren sha ki lad pathai khubor hadien ka jingwan ïakynduh ïa katei ka Myntri, u samla Treibor R Suchen, uba dei u General Secretary ka JSU Sengkmie, u la ong ba lyngba kane ka jingbyrngem byrsit jong ki paid Karbi, la sngewthuh shai ba kane ka dei ka jingkwah pynsngap jar bad ka jingkwah set ïa ka shyntur jong ki paradoh parasnam namar ba kane ka jingpynbeit pud pynbeit sam hapdeng ka sorkar Meghalaya bad ka sorkar Assam ka dang ïaid shakhmat.
U samla Treibor u la ong ba kane ka jingleh jong ki paid Karbi ka dei ka buit poh ba kin pyntieng pynsmiej ïa ki paradoh parasnam kiba shong ba sah ha Block-1 ba kin tieng ban kren bad ban dawa ïa ka hok ban wanphai biang shapoh ka jylla Meghalaya.
“Kumba ka long mynta, ki paradoh parasnam jong ngi kiba sah ha Block-1 ki kwah ban wanphai biang shapoh ka jylla Meghalaya, kane ka jingleh jong ki Karbi ban pyntieng pynsmiej ïa ki briew jong ngi ka long ban pynkbum ïa ki ba kin tieng ban dawa ïa la ka hok bad ban kren ïa ka hok ba ki kwah ban wanphai biang sha la ka jong ka jylla”, la ong u samla Treibor.
Shuh shuh u samla Treibor u la ong ba na ka liang ka seng, ka la ai jingmut ruh ïa katei ka Myntri ba ka long kaba donkam ban shim ïa ka jingïakren hapdeng ki artylli ki distrik; kata ka distrik Hamren bad ka distrik jong ka West Jaiñtia Hills bad kumjuh ruh ïa baroh artylli ki sorkar jong ka Assam bad ka Meghalaya ba kin ïakren halor ka suk ka saiñ bad ka jingshngaiñ jong ki paradoh parasnam kiba shong ba sah ha katei ka jaka.
“Ngi ngeit skhem ba ka jingïakren bad ka Myntri kan long kaba seisoh bad na ka liang jong ngi ka JSU, ngi kwah ba ka sorkar kan leh mar-mar ïa kaba donkam ban ïakren bad ka sorkar Assam ban ai ka jingïada ïa ki paradoh parasnam jong ngi kiba sah ha katei ka jaka”, la ong u samla Treibor.
