Shillong, Nailar 03:
Ka Jaiñtia Student’s Union (JSU) Sengkmie mynta ka sngi ka 3 tarik u Nailar 2023 ka la leit ban ïakynduh bad ban aiti da ka dorkhas ha ka Myntri ka sorkar jylla, ka Dr Mazel Ampareen Lyngdoh ban dawa ba ka sorkar jylla ka dei ban plie biang ïa ka jaka (Centre) thoh eksamin jong ka Meghalaya Service Public Commission (MPSC) ha sor Jowai khnang ban pynsuk ïa ki samla nongthep kam jong ka West bad ka East Jaiñtia Hills District ha ka leit ka wan.
Haba kren sha ki lad pathai khubor, u Samla Treibor R Suchen uba dei u General Secretary ka JSU Sengkmie, u la ong ba ha ki por kiba mynshwa ki ju don lai tylli ki ‘Centre’ na ka bynta ban thoh ïa ka eksamin MPSC kiba kynthup ha Shillong, Tura bad kawei ha Jowai. Hynrei kaba sngewlyngngoh ka long ba hadien shisnem arsnem la pynduhnoh ïa katei ka jaka thoh eksamin ha Jowai.
“Ka JSU ka ïaid shakhmat bad ka shim ruh ïa ka jingkitkhlieh kumba ki paidbah ki ud ki nam na ka bynta ki khun samla namar ban wan thoh eksam shaduh sha Shillong ka long kaba jynjar bad kaba khapngiah bad ka kham bun ka jinglut”, la ong u samla Suchen.
U samla Suchen u la ong ba ki khynnah samla kiba thep kam na Jaiñtia kim duna ïa ka 30-40 hajar ha ka shisnem. Kum ka seng ka la dawa na ka sorkar ba ka long kaba donkam ban plie biang ïa katei ka jaka thoh eksamin khamtam ïa ka MPSC khnang ba kan pynsuk ïa ki khun samla na ka jinglutksan bad kumjuh ruh kan pynsuk ïa ki ha ka leit ka wan namar ba ka jaka ka don kham hajan bad hapoh shnong hapoh thaw jong ki.
“Ka Jowai ka dei ka jaka kaba i biang paka ban wanrah sa shisien ïa kane ka jaka thoh eksamin na ka bynta ki khynnah samla jong katei ka thaiñ hapoh ka sor Jowai”, la ong u samla Suchen.
U Bah Suchen u la ong ruh ba na ka liang ka seng kan sa buddien halor kane ka jingdawa ban pynurlong ïa ka bad ba ka sorkar ka dei ban shimkhia ban pynïoh bhah lang hapoh Jaiñtia kumba long lang hapoh Shillong bad hapoh Tura.
“Ka Jowai ka dei ka sor kaba lah ban pdiang ïa kum kine ki eksam ban ai jingmyntoi ïa ki khynnah samla”, la ong u samla Suchen.
