Shillong, Nailar:
U Myntri ka Jylla, Bah A.L. Hek ha ka Sngi Balang u la ban jur ba dei ban don ka jingtohkit halor ka jingkulmar kaba la jia ha ka 24 tarik jong u bnai ba la dep ha Tura.
“Ka tnad kam pohïing ka dei ban peit ïa kiba kum kine ki jingjia – ka shong suk shong shngaiñ, ka dei ruh ka kamram jong ka Sorkar lyngba ka tnad kam pohïing…u DGP u don, u SP u don bad DC – kine ki hap ban khmih ïa ki bor pynïaid, ha kajuh ka por ïa ka suk ka saiñ,” la ong u Bah Hek haba kren sha ki lad pathai khubor.
La u kwah ne em ban don ka jingtohkit ba laitluid halor ka jingjia ha Tura, u Myntri u la ong, “Ha kano-kano ka jingjia ba kum kane, dei ban don ka jingtohkit la ka long ha kano-kano ka rukom khnang ban lap ïa ka jingshisha.”
“Ngi dei ban don ka jingshaniah ha ki pulit, ma ki ruh ki pyndep la ka kamram,” u la ong.
Halor ka jingdon bynta kiba shah kem bad ki seng saiñ pyrthei, u Bah Hek u la ong, “Lada jia eiei, ngim lah ban kynnoh ïa kano-kano ka seng saiñ pyrthei. Kine ki kam be-aiñ ki don beit.”
“Shu buh lashai lada jia eiei ïa ki dkhot jong kano-kano ka seng saiñ pyrthei, hato phin kynnoh beit ïa ka seng ne ka jingbthah ba la ai da ka seng…em. Kine ki leh hi shimet, phim lah ban kynnoh ïa ka seng,” la ong u Myntri.
Haba jubab halor ka jingpaw kyrteng u Vice-President ka seng ha katei ka jingjia, u la ong, “Lah ban dei mano-mano, haba u shah kem, ngim lah ban kynnoh ïa ka seng, ka dei ka jingleh jong u shimet.”
Shuh shuh haba biang ba ym lah ban kynnoh ïa ka seng, u Myntri u la ai nuksa ba lada jia ba u Bah Hek u leh kano-kano ka kam kaba bakla, dei ban kynnoh ïa u shimet namar dei ma u uba la leh ïa kata ka kam.
“Ban kynnoh ïa ka seng, ngam mynjur ïa kane,” u la ong.
Kum ban shu kdew hangne, 18 ngut ki pulit pahara jong u Myntri Rangbah ka Jylla, u Conrad K. Sangma ki la mynsaw ha ka 24 tarik jong u bnai ba la dep, hadien ka jingshah lun maw ha ki paidbhur na ka jingmih kynsan ka jingkulmar shabar jong ka jaka ba la pynlong jingïalang ha Tura.
Na ka liang u Myntri Rangbah u la lum ïa ka jingïalang bad ki nongïalam seng (ACHIK, GHSMC bad kiwei-kiwei), ki nongïalam shnong bad ki ophisar ïa kaba la pynlong ha ophis treikam jong u kaba ha Tura, West Garo Hills.
