Shillong, Nailar 03:
Ka hehduh jong ka State Education Commission ka Prof Sherwin May Sungoh ka la ong ba ki donkam ïa ki buit ban lah ban weng ïa ki jingeh kiba ïakynduh ha ka pule puthi bad ka jingïatreilang lang kan long ka lawei ïa ka pule puthi ha Jylla.
Haba pynpaw ïa kane haba ki lad pathai khubor ki ïoh ban ïakren ha ka sngi ba plie ïa ka ophis ka Commission ha MBoSE Shillong Office ha ka sngi basaw.
Kum ka Chairperson ka Prof Sungoh ka la ong ba ki mat bad ki jingeh kiba don ha ka pule puthi hap ba ïakren hapoh ka Commission bad ki lyngba buit yn lah ban weng ki jingeh bad ka jingïatreilang kan long ka lawei ïa ka pule puthi.
Haba kylli halor ka jingbun ki skul ba Meghalaya katba ka jingdon kiba pep skul shiteng por ruh ka bun bha, bad ka jingpynbeit thymmai ïa ki lynnong ai jinghikai, ka Prof Sungoh ka la ong ba kine ki dei ki mat kiba ki dkhot ka Commission kin sa ïatai lang hapoh ka Commission.
Haba ïadei bad ka National Education Policy (NEP) 2020, ka Prof Sungoh ka la banjur halor ka jingkongsan ka jingsdang ban pyntreikam ïa ka NEP naduh ka bynta ba sdang ïa ka tynrai ai jinghikai bad ka jingpynkhreh ka la ïaid mynta.
Ka la ong ba ka NEP kaba ïaid naduh skulbah ka la sdang ruh ha ki kolej bad kan sdang ruh naduh tynrai jong ka pule puthi.
U Myntri Rangbah u Conrad K Sangma u la ong ba ka bynta jong ka State Education Commission ka long ban peit ha baroh ki liang kiba dei ban kyntiew ïa ka pule puthi ha kane ka Jylla ha kaba yn lah ban weng ïa ki jingeh kiba hap ban mad.
La donlang u Myntri ka tnat pule puthi u Rakkam A Sangma, nalor u Adviser ka Commission, u Prof David Syiemlieh bad kiwei kiwei ki ophisar ka tnat pule puthi.
