Shillong, Nailar 03:
Ka Federation of Khasi Jaiñtia & Garo People (FKJGP) Upper Shillong Circle haba pynpaw ïa ka jingpyrshah kaba jur, ka la ong ba horkit-hordang kan nym shah bad ailad satia ïa ka jingthmu ka Sorkar ban pynkynriah ïa ka Anjalee Petrol Pump sha Upper Shillong, da kaba ai bujli ïa ka jaka jong ka tnat Animal Husbandry & Veterinary.
Ban pynpaw ïa kane ka jingpyrshah, ka seng ha ka sngi Palei ka la leit ban ïakynduh markhmat ïa u Myntri ba khmih ïa ka tnat Animal Husbandry u Bah AL Hek bad la aiti ruh ïa ka dorkhas ha kaba ïadei bad kane ka jingpyrshah.
Haba kren sha ki lad pathai khubor, u President ka FKJGP Upper Shillong, Bah Kitboklang Nongphlang u la ong ba ka seng ka la ïoh ïa ka jingtip ba ka la don ka jingleit sorjamin jaka sop-sop hapdeng ka tnat Animal Husbandry bad ki trai jong ka Anjalee Petrol Pump ha Upper Shillong ban ïoh pynkynriah noh ïa kane ka petrol pump nangne na nongbah Shillong.
Une u nongïalam ka FKJGP Upper Shillong Circle u la ong ba kum ka seng ka la ïoh jingtip ba ka jingthmu jong ka sorkar jylla ban ai jaka ban tei thymmai ïa ka Anjalee Petrol Pump sha Upper Shillong ha ka jaka jong ka tnat Animal Husbandry and Veterinary ha ka jingheh kaba palat 13000 square feet, ka long na ka bynta ban pynkylluid ïa ka surok ha nongbah Shillong bad kum shi bynta jong ka projek Smart City.
U Bah Kitboklang u la ong ba ka seng kam pyrshah ban pynkynriah ïa ka Petrol Pump sha kawei ka jaka, hynrei ka seng kan ïeng pyrshah ban ai jaka ha Upper Shillong namar ba ka seng ka sngew ba dang donkam ïa ka tnat Animal Husbandry and Veterinary ban tei ïa ki ophis ki ban kyntiew ïa ka kam ri jingri.
“Ngin nym ailad da lei lei ruh ïa ki bar jylla ban wan buh petrol pump ha ka jaka jong ngi, bad lada ka sorkar ka kwah ban pynkynriah ka dei ban pynkynriah sha kiwei pat ki jaka ym sha ka thaiñ Upper Shillong,” la ong u Bah Kitboklang.
Ha kaba ïadei bad kane ka jingïakynduh ïa u Myntri, une u nongïalam ka FKJGP u la ïathuh ba na ka liang u Bah A.L Hek u la ong ba ïa kane ka kam la peit bad khmih hi da ka tnat Pynroi Sor (Urban Affairs) kaba la shu bthah ïa ka tnat Animal Husbandry and Veterinary ban peit jaka ha Upper Shillong.
“Ka seng kan sa buddien ïa kane ban pynthikna ba ki bar jylla kim dei ban ïoh jaka khamtam ha Upper Shillong bad na ka liang jong ka seng kan sa leit ban ïakynduh ïa ki bor bahalor bad wat ïa u Myntri Rangbah ka jylla ban pynpaw ïa ka jingpyrshah halor kane ka jingthmu,” u la ong.
