Shillong Nailar 03:
Kum shi bynta ban ïatai bad ïaphylliew jingmut halor ka jingdonkam ban pynkit noh ïa ki mar poh khyndew da ki lieng ne jhad sha kiwei ki ri ne ki jylla, na ka liang ka Inland Waterways Authority of India (IWAI) ka la lum ïa ka jingïalang kaba nyngkong eh bad ki nongkhaïï dewïong bad mawshun ka jylla Meghalaya.
Ïa kane ka jingïalang la pynlong ha ka sngi Palei ha kaba u Vinayak Azaad, IRS Member (Traffic & Logistics) Inland Waterways Authority of India, u la ïadonlang nalor ki heh ophisar ka jylla na ka tnat Mining bad ki nongkhaïi dewïong kiba la ïoh jingbit ban tih ïa u mawshun katkum ka juk stad saïan bad ki nongkhaïï mawshun na ka jylla.
Haba kren sha ki lad pathai khubor, na ka liang jong u Vinayak u la ong, ka jingthmu hi ka long ban kyntiew ha ka jingpyndonkam ïa ki wah ne ki National Waterway, khamtam eh ha ka thaiñ shatei lam-mihngi jong ka ri bad ban kyntiew ïa ka thaiñ ha ka ban pyndonkam ïa ki wah kiba don ha ka ri bad ïa ka lynti ïaid jong ka Indo Bangladesh Protocol (IBP).
Ym tang ba kan kyntiew ïa ki jingpyndonkam ïa ki wah ne ban pynneh pynsah, hynrei ha kajuh ka por ban kyntiew ruh ïa ki kam jngohkai lyngba kine ki wah, u la ong.
Nangta, u la ong ruh ka jingthmu jong ka jingïalang ka long ban ïakren bad ban sngewthuh ïa ki jingdonkam jong ki nongkhaïï ha kaba ïadei bad ka kam khaïï-pateng bad kiwei pat ki ri.
“Ngi don ïa ki Terminal Operator ki ban pynïaid ïa ki Terminal ha Pandu bad Dhubri, Guwahati, Assam, kaba dei ruh ka lynti ïaid ka ban pynïasoh bad ka Indo Bangladesh Protocol bad kaba pynïasoh bad kiwei pat ki bynta jong ka ri India,” la ong u Vinayak.
Shuh shuh u la ong, ba shen kin sa leit ban khmih ïa ki wah kiba don ha jylla Meghalaya kiba ïajan bad ka ri Bangladesh ban peit ïa ka jingeh bad ka jingjylliew ka jong ki khnang ban sngewthuh la yn lah ban pynurlong ïa ka khaïï-pateng lyngba ki lieng ne ki jhad kit mar ki ban ïaid ha ki wah bad ba ka jinglut jingsep ruh kan long kaba shong tad bha na ka bynta ki nongkhaïï haba ïanujor bad kiwei pat ki rukom khaïï-pateng.
Katba uwei na ki nongkhaïi na ka jylla, Bah Sajay Laloo u la ong, ka jingkhaïï pateng lyngba ki lieng heh ne Jhad kan pynduna bha ïa ka jingpynlut pynsep ha ka kit ka bah bad lada kyntiew bad pynïaid shakhmat ïa kane ka projek ha ka jylla.
Nalorkata, u la ong ba ka kit ka bah bad kiwei kiwei ki jingpynbit pynbiang ki long kiba kongsan bha ha ka khaïï-pateng kaba lah ban pynïap ne kyntiew ïa ki mar ki mata. Lada ka dor ha ka kit ka bah ka long kaba remdor, kumta yn ym don ïew don hat ban die ïa ki mar ki mata. Hynrei lada ka duna dor, kumta kan don ka jingdawa ha kylleng ki ri bad kane kan ïarap ha ka ban shalan ïa u dewïong sha kylleng ki ri.
