Shillong, Nailar 03:
Uwei u briew ïa uba la suba jur ba u la shoh bad lute ïa iwei i Meiieid ha ka shnong Umsohsun hadien ba u la rung jubor ha ka ïing jong i, u la shah kem noh ha ki pulit ka nongbah Shillong.
Katkum ka kyrwoh khubor ba la pyllait da u Superintendent of Police, East Khasi Hills, u Bah Sylvester Nongtnger u la ïathuh ba ki pulit ka thanat Shillong Sadar, ki la ïohpdiang ïa ka ejahar ha ka 30 tarik Naitung kaba la ujor ba ha ka 29 tarik, uwei u briew ba la tap durkhmat u la rung jubor ha ka ïing sah jong i Kong Janaki Toi ba la 70 snem ka rta kaba don ha Umsohsun bad ha kaba u la shoh ïa i shuwa ba un knieh ïa ka sati ksiar, ka ATM card bad ka mobile phone.
Halor kane ka ejahar, ki pulit ki la pynlong ka jingtohkit bad ki la lap ksai ba uwei u briew na Mawblei u dei uba la suba donkti ban leh ïa kane ka kam.
Shuh shuh la ïathuh ba ha ka 1 tarik Nailar, ki pulit ki la leit ban khynra ïa ka ïing sah jong une u briew bad ïohbat ruh ïa u.
Nangta, u SP u la ïathuh ba ha ka jingtohkit, une u briew u la phla ïa ka jingdonkti ban leh ïa kane ka kam bymman haba pyntip ruh ba u la dep ban die ïa ka sati ksiar sha uwei u nongshna ksiar ha Mairang.
Ki pulit ki la kurup noh ïa kane ka ksiar bad kem ruh ïa une u briew bad ka jingtohkit mynta ka la ïaid shakhmat.
