Shillong, Nailar:
Ka Hynñiewtrep Youth Council (HYC) ha ryngkat ka jingïadonlang bad ka North Eastern Hill University Student’s Union (NEHUSU) ha ka Sngi Ba-ar ka la leit ban ïakynduh ïa u Myntri ka tnad pule-puthi ka sorkar jylla, u Rakkam A Sangma halor ka jingshim rai jong ka skulbah North Eastern Hill University (NEHU) ban pyntreikam noh ïa ka National Education Policy (NEP) ha baroh ki kolej kiba pynïasoh bad ka NEHU ha kata ka dur kaba ki khot ka ‘Hybrid Mode’ kaba mut ba kin don ki kolej ki ban nang ïaid noh shakhmat ban pyntreikam noh ïa ka NEP bad kin don pat ki kolej ki bym pat lah ban pyntreikam ïa ka NEP.
Haba kren sha ki lad pathai khubor hadien ka jingïakynduh ïa utei u Myntri, u President ka HYC, u Bah Robert June Kharjahrin u la ong ba ha kaba sngap ïa ka jingpynsngew da artylli ki kynhun kiba ong ba ka jylla Meghalaya ka la biang ban pyntreikam ïa ka NEP ha ki kolej bad kawei pat kaba ong ba ka jylla Meghalaya kam pat biang ban pyntreikam ïa ka NEP. La sngew ba baroh artylli ki kynhun ki kren ïa kaba dei, hynrei kane ka jingjia ka la pynkulmar jingmut shikatdei eh ïa ki khynnah pule, ki nonghikai bad kumjuh ïa ki kmie ki kpa. U la ong ruh ba dei halor kane ka nongrim na ka liang ka seng kam banse ban mih shakhmat ban kren halor kane ka mat.
U Bah Kharjahrin u la ong ba katei ka jingkulmar jingmut kaba mih ka la pynlong ban buh jingkylli ba kumno ha kajuh ka jylla bad ha kajuh ka skulbah kin don arjait ki kolej kata kawei ka kolej kaba pyntreikam ïa ka NEP bad kawei pat ka bym pyntreikam ïa ka NEP. Kane kan wanrah ïa shibun tylli ki jingeh wat ha ka ïoh kam ïoh jam jong ki khynnah pule ruh.
“Kane kan wanrah ïa kaei kaei ka ban ktah ïa ka ïoh kam ïoh jam jong ki khynnah, ka ban ktah ïa ka jingmut jingpyrkhat ki khynnah bad kan ktah ruh ïa ka rukom ïadei hapdeng ki kolej para ma ki”, la ong u Bah Kharjahrin.
U Bah Kharjahrin u la ong ba na ka liang ka seng ka la dawa da kaba tyngeh ba kine baroh ki jia ka dei namar ba ka jylla kam don ïa ka skulbah la ka jong wat haba ka jylla ka la ïaid la kumba 50 tylli ki snem, hynrei kam pat don ïa ka skulbah kaba biang.
“Kane ka dei ka por ba ka sorkar jylla kan kyndit bynriew, ngi la don ïa ka jingeh ha kaba ïadei bad ka CUET bad ka daw ka dei namar ba kam biang ka skulbah la ka jong bad mynta ngi don ka jingeh ha kaba ïadei bad ka NEP bad kane ruh ka dei ba ngim don ïa ka skulbah la ka jong”, la ong u Kharjahrin.
Na ka liang u Myntri ka tnad pule puthi u la ong ba ka sorkar jylla kan sa khot ïa ka jingïalang jong ka Higher and Technical Council ha kaba baroh ki khlieh jong ki jaka pule kin sa ïa don lang ha katei ka jingïalang ban ïakren halor ka jingpyntreikam ïa ka NEP.
