Shillong, Nailar:
Ar ngut ki samla shynrang na kane ka nongbah Shillong ki la poi mynta sa sha ka rynsan ïakob shad ha Mumbai kaba tip kum ka ‘Hip-Hop India’. Kane ka jingpaw jong kine ki ar ngut ka dei lyngba ka shlem hikai shad kaba don ha Dongkadiang, Nongmensong kaba la tip kum ka EDI Dance Academy.
Kine ki ar ngut ki long u Steve Jyrwa (16 snem) bad u Ashmit Gurung (18 snem) bad ïa ka jingïakob shad Hip-Hop India ha Mumbai la pyni paidbah lyngba ka Amazon MiniTv man la ka sngi Thohdieng.
Ïa kane ka jingïakob la bishar da ki khlur ak phlim bad nongshad ba pawnam ka Bollywood kum ka Nora Fatehi bad u Remo D’Souza.
Kine ki khynnah donsap kiba la ïoh jinghikai ban shad, hadien ba ki la shahjied ha ka Audition kaba la pynlong ha Kolkata, ki la shahjied pat ban ïakhun ïa ka Final Audition ha Mumbai ha ki khyndiat sngi ba la dep.
Hadien ka jingshad jong kine ki ar ngut kaba la pynshoh biej ïa ki nongpeitkai bad nongbishar, ka Nora bad u Remo kiba dei ki nongbishar, ki la ai 100 point namar ka jingtbit jong ki bad kum ka lad ban jam shakhmat ha ki kyrdan ïakob jong kane ka rynsan.
Ka Nora bad u Remo ki la ïaroh shikatdei eh ïa ka jingsted bad ka jingbiang por jong u Steve bad Ashmit ha ka rukom shad naduh ka rukom pynkhih ïa ki kti ki kjat bad ka met, bad haba kut ki jingshad, kine nongbishar ki da ïeng ruh ban ai mynsiem shuh shuh ïa kine baroh ar ngut ki samla na Shillong.
U Steve bad Ashmit ki dei kiba la shah hikai ha EDI Dance Academy la kumba 7 snem eiei da ka trai jong kane ka Academy, ka Kong Zarina Jyrwa ha ryngkat u Rohit Singh Rajput.
“Ki dei ki khynnah kiba trei shitom bad pynleit jingmut bha ha ka por ba ki shah hikai”, la ong ka Kong Zarina kaba la ïathuh ba ki khynnah kin hap ban kyrshan hi ïa ka jinglut jingsep haba ki leit ïashimbynta sha ki rynsan ïakop shad bapher bapher.
“Ynda la poi sha ka bynta ban poi sha ka Grand Final, ki khynnah kin sa ïoh jingkyrshan na katei ka rynsan ïakob”, ka la ong da kaba pynpaw ka jingkhmih lynti ba u Steve bad u Ashmit kin trei shitom ban wanrah burom ïa ka Academy bad ia ka Jylla hi baroh kawei.
Halor ka rukom sei sap shad u Steve bad u Ashmit, ka Kong Zarina ka la ong ba ka long kaei-kaei kaba sngewkmen bad sngewsarong na ka bynta jong ki haduh ba ki nongbishar ki da ieng ban ai mynsiem bad iaroh ia ki.
“Nga don ka jingngeit kaba skhem ba u Steve bad u Ashmit kin long ruh ka nuksa ïa kiwei pat da ka jingtrei shitom bad jingpynleit jingmut jong ki bad kin ïoh ban wan shakhmat ban jop ïa kane ka rynsan”, la ai jingkyrmen ka Kong Zarina da ka jingsngew skhem bad bynrap ba kine ki ar ngut ki dang don ha Mumbai bad ki donkam ïa ka jingkyrshan bad jingïarap jong ki paidbah ka Jylla.
