Khliehriat, Nailar 03:
Ka Synjuk Waheh Shnong East Jaiñtia Hills District (SWSEJHD) ha ka 2 tarik Nailar ka la ïakynduh ïa u Myntri Rangbah ka Jylla u Conrad K Sangma bad aiti ruh ïa ka dorkhas halor ki mat jingdawa na bynta ka bha ka miat jong ka thaiñ East Jaiñtia.
Katkum ka dorkhas, ka SWSEJHD ka la dawa ban pynbha ïa ka surok bah National Highway-6 (NH-6) kaba la jot rathai bad buh jingeh shi katdei eh ïa ki nongleit nongwan lyngba kane ka surok.
Ka SWSEJHD ka la pynpaw ruh ka jingsngewkhia halor ka jingtwa khyndew man ka por ha Sunapur Tunnel bad wanrah ka jingsahkut ki kali da ki bun bun kynta na ka daw ka jingtwa khyndew ha Sunapur Tunnel. Ha kaba ïadei bad kane ka synjuk ka la dawa na u Myntri Rangbah ba un shimkhia ban ïakren bad ki bor bahalor jong ka NHAI ban shna ïa ka Tunnel ha ki bynta ba twa khyndew khnang ban shngaiñ ki nongleit nongwan.
Shuh shuh ha ka jingïakynduh bad u Myntri Rangbah, ka synjuk ka la dawa ban pynheh ïa ka surok NH6 sha ka Four Lane khnang ban pynsuk ïa ka leit ka wan bad pyllait na ka jingsahkut kali, namar kane ka surok ka dei u budlum jong ka jylla Meghalaya bad pynïasoh ruh bad kiwei ki jylla.
Ka synjuk ka la dawa ruh ban pynshna ïa ka surok Sutnga-Saipung ba don 46 km bad ba jinglong jingman jong kane ka surok ka long kaba la sniew shaba palat bad buh jingeh ïa ki paidbah khamtam ha ka pang bad shitom.
Ka synjuk ka la dawa ruh ban buh ïa ka Government Secondary School, Higher Secondary School bad ka kolej sorkar hapoh ka district namar kumba long mynta ym pat don kawei ruh ka jaka pule hapoh ka district. Kane ka la buh jingeh kaba khraw ïa ki kmie ki kpa ban phah skul ïa ki khun ki kti shabar ka district namar naduh ba khang ïa ka jingtih dewïong bun ki khynnah ki hap ban pep skul noh shiteng por namar ki kmie ki kpa kim lah kyrshan shuh ïa ki ban bteng ki jingpule.
Ka SWSEJHD ka la dawa ruh ban buh ïa ka Land Custom Station hapoh ka district khamtam ha ki bynta ka shnong Kuliang lane ha kiwei ki bynta jong ka East Jaiñtia Hills ban pynsuk ïa ka khaïi ka pateng hapdeng ki ar Ri (India-Bangladesh) lyngba ka Meghalaya bad ban long ruh ka lad kamai kajih ïa ki paidbah namar ka district ka don shibun ki mar poh khyndew kynthup u mawshun, dewïong, ki mar rep bad kiwei kiwei.
Ha kaba ïadei bad ka lynti Rel, ka synjuk la ka pan ka jingpynshai na u Myntri Rangbah, bad na ka liang u Myntri Rangbah u la ong ba un phah da ka jingthoh halor kane ka mat.
Kane ka long katkum ka kyrwoh ba la phah da u Bah Hambertus Nongtdu, President SWSEJHD bad u Bah Jesper Bareh, General Secretary SWSEJHD.
