Shillong, Nailar 03:
Ka jingrhah ki nongkhaïi masi be-aiñ sha Bangladesh ka la paw tyngkreiñ hadien ba ki BSF Meghalaya Frontier ki la ïoh kurup ïa ki artylli ki masi ba la shu tyngngian beiñ hapoh ki artylli ki kali Maruti Alto.
Katkum ka kyrwoh khubor na ki BSF, la ong ba ha Sngi Palei, la ïoh ban kurup ïa kitei ki masi ba la shu tyngngian beiñ ha ki artylli ki kali Alto ba la thmu ban shalan tuh sha Bangladesh lyngba u khappud ha East Jaiñtia Hills.
Ki BSF ki la ong ba ïa kitei ki artylli ki kali la ai dak ba kin sangeh shwa ha ka jingkieng Sonapur, hynrei ha ka jaka ba kin sangeh, ki nongñiah ki la phet krad pynban sha ka thaiñ Umkiang.
Na ka liang ki BSF ki la beh thong ïa kitei ki kali bad hadien katto katne por, ki la lap ïa kitei ki kali bad ïa ki masi kiba la shu tyngngian. Hynrei ki nongñiah jong kitei ki kali Alto ki la ïoh lad ban phet krad.
Ki BSF ki la aiti ïa kitei ki kali bad ki masi sha ki pulit ka Umkiang ba kin leh ïa kaba donkam.
