Shillong, Nailar 03:
Ka Khasi Students’ Union (KSU) Laban Circle ka la dawa na ka tnat Khlaw (Forest) ba ka dei ban weng noh shisyndon ïa ki jingtei be-aiñ ha Mahadev Khola bad byrngem artad lada kam leh kumta na ka liang ka seng ruh kan leit ban tei da ki ïing ban ai sah ïa ki trai ri.
Kane ka jingbyrngem jong ka KSU ka la long hadien ba ki nongïalam ka KSU Laban ki la hiar jurip sha Mahadev Khola ha ryngkat lang bad u Range Officer ka tnat Khlaw u Bah SM Lyngdoh bad ki pulit.
Haba kren sha ki lad pathai khubor, u President ka seng u Samla Ruben Najiar u la ong ba kane ka jingwan jurip ka seng ïa kane ka jaka ka dei namar ba la sakhi ba bun kiba sah ha kane ka jaka ki dei kiba sah be-aiñ bad kiba donkti ban pynjaboh ïa ka khlaw bad ki tyllong um ba pyndonkam da ka shnong Lawsohtun bad kiwei ki shnong kiba mar khap.
“Ha ka jingshisha ka jingai jaka ïa ki riewngeit Hindu ha Mahadev Khola ka dei beit thik tang ban tei ïa ka jaka leh niam ne ka Mandir, hynrei kine ki riewngeit ki la pynkheiñ ïa ka jingïateh da kaba tei ki ïing bad kiwei ki jait jingtei be-aiñ khlem da ïoh kano-kano ka jingbit na ka tnat sorkar khamtam na ka tnat Khlaw.
“Ka seng ka ïoh jingtip ba haduh mynta ki don kumba 30-40 tylli ki longïing kiba la kam trai ïa kane ka jaka bad nalor kata kine ki briew ki ju ai wai ïa ki bar jylla ban sah hangne da kaba siew T.100 ha ka shisngi bad namar ka jingsdang jyllei ki longïing kane ka jaka ruh ka la jaboh bha,” la ong une u nongïalam ka KSU.
“Hashwa ba ngin wan hiar jurip sha kane ka jaka, ngi la dep ruh ban leit aiti ka dorkhas sha u Principal CCF & HOFF ka tnat Forest & Environment ka sorkar jylla u RS Gill, ban dawa weng noh ïa ki briew kiba sah be-aiñ ha Mahadev Khola,” la ong u samla Ruben.
Shuh shuh u la ong, ki briew kiba sah be-aiñ ha kane ka jaka ki la pan jingbit ban pynkylla ïa kane ka jaka kum ka jaka sah bad ban shna kum ki Guest House bad kiwei kiwei ki jingtei ban pyndonkam ma ki.
Haba ïadei bad kane u Range Officer u la ong ba na ka liang ka ophis kan hap ban bishar ïa ki kot ki sla haba ïadei bad kane ka jaka bad kan hap ruh ban pynbiang ïa ka kaiphod halor kane ka jingwan jurip ha ryngkat bad ka KSU.
“Ngi hap ïaid katkum ki kyndon bad ngan hap ai ïa ka kaiphod sha u DFO, bad na ka liang u DFO ruh un sa phah ïa ka kaiphod sha kiba halor ban shim rai halor kane,” la ong u Range Officer.
