Khliehriat, Nailar 04:
Ka jingïakynduh lang kaba ar hapdeng ka KSU Narpuh Circle bad ki Waheh Shnong ka thaiñ Elaka Narpuh kaba la long ha ka 3 tarik mynta u bnai ha Mynkre, da kawei ka jingmut ka la rai ban ïaid shakhmat ban pynlong da ka jingïakhih paidbah ha ka 8 tarik Nailar halor ka jingkuman bad jingsngap mynthi ka Sorkar bad ka National Highway Authority of India (NHAI) ban maramot ïa ka surok ba la sniew palat pud hapoh u pud ka thaiñ Narpuh, kata naduh Mynkre shaduh Ratacherra.
Wat hadien ba la dep ai ïa ka jingthoh sha u DC ka EJHD ban dawa ïa ka NHAI ban sdang maramot noh hapoh 7 sngi naduh ka tarik ba la aiti ïa ka dorkhas, hynrei haduh mynta ym pat i dak eiei ruh halor kane.
Ka jingïalang ka la pynpaw ba ïa katei ka shithi la dep phah naduh ka 26/07/2023 bad ka jingai por ba 7 sngi ka la kut noh ha ka 02/08/2023. Ki la ong ruh ba namar ym don kano-kano ka jingpyni dak na ka liang ka Sorkar ne NHAI, kumta kane ka la pynbor ïa ki ban shim ïa ka rai kaba tyngeh – ban pynlong da ka jingïakhih paidbah ha surok NH-6 hapoh thaiñ Elaka Narpuh.
La ong ruh ba kane ka jingïakhih kan long da ka jingrah ‘Placard’ bad ki jingthoh ban pynrem jur ïa ka Sorkar bad ïa ka NHAI. Ka jingsniew ka surok kam long shuh ka sien ba nyngkong, hynrei da ki bun-bun snem. Kane ka paw ka jingbym kheiñ snep ïa ki paidbah jong ka thaiñ.
Ha katei ka jingïakhih paidbah da kaba mih surok yn ïalum lang shi jaka, bad la kyrpad ïa baroh ki kali kamai ‘tourist’ bad kali rit, kali heh bad kiba wan nabar Jylla kiba ïaid lyngba kane ka surok ba kin sngewbha ban ai ka jingkyrshan da kaba wan ïasnohkti lang ha katei ka jingïakhih da kaba sangeh shi sngi ïa ki kam jong ki baroh.
La kyntu ruh ba naduh ki kali dumper kit mawshun (Limestone), ki kali sumo kamai na Lad Rymbai sha Kalaiñ Badarpur kin sngewbha ban sangeh ka kamai ha katei ka sngi. Kane ka jingïakhih ba jai-jai kan long naduh ka por 10 baje mynstep haduh ka por 4 baje janmiet.
Na ka bynta kane ka sngi la pyllait noh tang na ka bynta ki kali kit nongpang, ki kali nongthoh khubor bad kiwei-kiwei kiba don kam kyrkieh kumba ju long.
