Shillong, Nailar:
Namar ka jingduna ka jingpynmih ïa ka doh hapoh ka jylla kaba la pynlong pat ïa katei ka mar bam ban kiewdor, na ka liang ka Federation of Khasi Jaiñtia & Garo People (FKJGP) South West Khasi Hills District ha ka Sngi Ba-ar ka la leit ban ïakynduh bad aiti da ka dorkhas ha u Myntri ba dei khmih ïa ka tnad kam ri jingri ka sorkar jylla, u Bah Alexander Laloo Hek ban dawa ban buh noh da ka jaka ri syiar bad sniang kaba bit ba biang hapoh katei ka distrik.
Haba kren sha ki lad pathai khubor, u President jong ka FKJGP SWKHD, u Bah Kenes Nonglait u la ong ba hadien ka jingïakynduh ïa utei u Myntri, ka seng ka sngew ba kane ka jingdawa kan long kaba seisoh bad na ka liang jong utei u Myntri u la ong ba un sa khmih bha shwa halor kane bad un sa shim ïa ka jingkitkhlieh halor kane ka kam.
“Ïa kane ka kam ri jingri kaba ngi la ïoh ban ïakynduh bad u Myntri, ngi sngew ba kan kaba seisoh hadien bad na ka liang u la ong ba un sa shim ka jingkitkhlieh halor kane ka kam”, la ong u Bah Nonglait.
U Bah Nonglait u la ïathuh ruh ba na ka liang jong utei u Myntri u la kular ba ha kine ki khyndiat sngi un sa pyllait ïa ka skhim kaba ïadei bad ki paidbah hapoh ka ‘Veterinary’.
“Ngi kyrpad ïa ki paidbah nongshong shnong ka distrik ba kin shim ïa kane ka lad ban leit sha ki Veterinary kiba don ki ophis ha manla ki block bad ban buh ïa ki phorm khnang ba kin ïoh ïa kita ki skhim kiba na ka liang jong u Myntri u lah kular”, la ong u Bah Nonglait.
Shuh shuh u Bah Nonglait u la ïathuh ba ka jingdawa jong ka seng ban buh noh da ka jaka ri syiar bad sniang kaba paka hapoh ka distrik ka dei namar ka jingïohi ïa ka jingkiewdor ki marbam khamtam ka doh bad ka daw ka jingkiewdor ka dei namar ba hap ban thied ïa ki mar na sha kiwei pat ki jylla. Kumta ka jingdawa jong ka seng ban buh noh ïa ka jaka ri syiar bad sniang ka long ban ïarap ïa ki jingeh kiba baroh ki mad kata ban pynhiar ïa ka dor jong ka doh bad khnang ba ka jylla kan lah ban pynmih hi ïa ka doh khlem da ap na kiwei pat ki jylla.
