Shillong, Nailar:
Ka Jaiñtia Student’s Union (JSU) Khliehriat Circle mynta ka sngi ka 3 tarik u Nailar, 2023 ka la leit ban ïakynduh bad pynsngew ïa ki jingeh bad ki jingduna kiba don hapoh ka Khliehriat Civil Hospital ha ka Myntri ka tnad ka koit ka khiah ka sorkar jylla, ka Dr. Mazel Ampareen Lyngdoh.
Haba kren sha ki lad pathai khubor hadien ka jingwan ïakynduh ïa katei ka Myntri, u President jong ka JSU Khliehriat Circle, u samla Livingson Sama, u la ong ba kumba ka long mynta katei ka jaka ai jingsumar kaba don ha East Jaiñtia Hills District ka dang don bun bah ki jingduna naduh ki jaka leit shabar, ka umbam umdih, ki dawai dashin bad kiwei kiwei ki jingdonkam.
U samla Sama u la ong ruh ba katei ka Civil Hospital kaba lah dei ban don ïa ki 100 tylli ki jingthiah, hynrei haduh mynta ka dang don tang kumba 40-45 tylli ki jingthiah bad kane kam long kaba ïahap satia.
“Na ka liang jong ka seng JSU Khliehriat Circle, ngi lah ïeng skhem ba ngin dawa bad ngin ïeng beit ha kata ka nongrim ba ngin ïoh ïa kaei kaba ka sorkar ka lah plie paidbah kum ka Civil Hospital”, la ong u samla Sama.
Na ka liang ka Myntri ka la ai ka jingkular sha ka seng ba kan sa buh por 10 sngi ban pynbit pynbiang ïa ki jaka leit shabar, ka umbam umdih bad kiwei kiwei ki jingdonkam kiba dei ban don hapoh katei ka jaka ai jingsumar. Ka Myntri ka la ong ruh ba lada long kaba lah, ha ka 15 tarik u Nailar, 2023 kaba dei ruh ka sngi kaba kan sa leit ban pynher ïa ka lama lai rong jong ka Ri hapoh katei ka distrik ha ka jingrakhe ïa ka sngi laitluid jong ka ri, kan sa hiar ban jurip ïa katei ka jaka ai jingsumar ha ryngkat ka jingïadonlang bad kitei ki sengbhalang. Lada kam ïoh ban hiar ha katei ka sngi, ka la buh da kawei ka tarik ba kan hiar ban jurip kaba long ha ka 25 tarik u Nailar, 2023.
“Katkum ka jingïakynduh jong ngi bad ka Myntri, ngi ngeit skhem ba ka kam bad kaei kaba ngi la thmu bad ba ngi la ïaid lynti kan urlong, ngim kwah ban da kren than hynrei ngin peit ïa ka kam ba kan ïaid beit bad ba ka jingïaid lynti jong ngi ruh kan long kaba don jingmut”, la ong u samla Sama.
