Shillong, Nailar 04:
U Chairman ka North East Students Organisation (NESO), Bah Samuel Jyrwa u la pynpaw ba haduh mynta ka jylla Manipur kam pat long shngaiñ hadien ba ka kynhun ki samla pule na kylleng ki jylla ka thaiñ shatei lam mihngi ki la leit jngoh ïa ki jaka sah shipor jong ki jaitbynriew Meitei bad Kuki hadien ka jingïakajia kaba la neh mynta la lai bnai kynthih.
U Bah Samuel u la ïathuh ba wat la ka don ka jingpyrkhing harud surok haba ap pahara da ki paidbah bad don ki bynta ba ap pahara ki pulit, hynrei ka kynhun ka la ïoh ban rung sha kiwei pat ki distrik jong ka Manipur ka dei namar baroh arliang ki kynhun ki la ap haba ka NESO ka leit jngoh ïa ki.
Ha kajuh ka por ka NESO ka la ïoh ban ïakynduh ïa ka Lat ka Manipur ban phah tuklar mardor da ka Sorkar India khnang ban wanphai biang ka shong suk shong saiñ ha katei ka jylla. Ka NESO ka la ïoh ruh ïa ka lad ban ïakynduh ïa u Myntri Rangbah jong ka katei ka jylla u Biren Singh.
“Ka long shisha kaba isynei ïa ki briew ne ki khyllung, khynnah bad ki tymmen ki kro haba ki sah ha jaka ba la pynsah kyrpang ha ki skul bad ki kolej” u la ong.
U la ïathuh ba kane ka jingleit sha Manipur ban ïakynduh ïa ki seng bapher bapher ban pynpaw halor kane ka jingjia ba sngewsynei ban wanrah biang ïa ka jingsuk.
“Ka jingsngewkhia kum ka kynhun ka dei namar ka jingbym ïoh lad shuh ki khynnah ban pule ha ki skul, ban kyntu ïa ka sorkar ban thaw ki lad ki lynti ba ki khynnah kin ïoh biang ïa ka jingpule” u la ïathuh.
Shuh shuh haba ki dkhot ka NESO ki ïaid ha ka surok ban leit sha kiwei ki distrik ki don tang ki pulit bad ki shipai kiba peit ïa ki kot ki sla ban pynrung kyrteng. Hynrei na ka liang ki paidbah kiba ïeng ha surok kim shym la khang lynti namar baroh ar kynhun ki seng kiba la dep ap lypa ïa ki haba ki wan ban kynduh kyrpang ïa ki.
Nalor kata, u la batai ba ha ka NESO ïa ki Kuki kiba don ha Manipur la mihkhmat da ka Mizo Zirlai Pawl (MZP) kaba na Mizoram, katba na ki Meitei la mihkhmat da ka All Manipur Students’ Union (AMSU).
Namar kata, u Bah Samuel u don jingkyrmen ba ka jingsuk kan wan ha katei ka jylla ka shong beit ha ka bor jong ka Sorkar India ban wanrah ka jingïasuk hapdeng kitei ki jaitbynriew kiba don hapdeng ka jingïakajia.
Ki samla pule na kylleng ka jylla shatei lam mihngi kiba don ha ka kynhun North East Students Union (NESO) ki kynthup ïa ka All Arunachal Pradesh Students’ Union (AAPSU), All Assam Students’ Union (AASU), All Manipur Students’ Union (AMSU), Garo Students’ Union (GSU), Khasi Students’ Union (KSU), Mizo Zirlai Pawl (MZP), Naga Students’ Federation (NSF) and Twipra Students’ Federation (TSF).
Kane ka kynhun ki samla pule ka la leit ïuhkjat sha Manipur naduh ka 1 tarik Nailar bad kan wanphai ha ka 3 tarik jong ujuh bnai.
