Shillong, Nailar 04:
Ka jingbym pyni sakhi bad ki kot ki sla na ka liang ka Meghalaya hakhmat ka RK Phukan Commision of Inquiry halor ka jingjia ha Mukhroh ka la pynlong ïa kane ka Commission ban pynmih ïa ka jingpynbna paidbah na ka bynta ban khot biang ïa ki sakhi na Meghalaya bad ki kot ki sla kiba dei ban phah sha ka Commission namar kan sa don ka jingshong tohkit ha Assam House ha Shillong ha ka 7 tarik mynta u bnai ha ka por 10 baje mynstep.
Ha ka jingpynbna ba la pynmih da ka Commission, ka la ong ba ka la ïohpdiang ïa ki jingthoh na ki sakhi na Assam kiba la phah sha ka Commission, hynrei na Meghalaya ym pat don ki sakhi ne ki kot ki sla ban phah sha ka Commission.
Ha kawei pat ka liang ka Khun Hynñiewtrep National Awakening Movement (KHNAM) ka la ther tyngeh ïa ka Sorkar Meghalaya halor ka jinglehsting haba ïadei bad kane ka jingjia.
Kum ban pynkynmaw, ka Sorkar Assam ka la thung ïa ka RK Phukan (Retd) Commission of Inquiry ban tohkit bniah halor ka jingjia ha Mukroh, ha kaba 5 ngut ki Khasi bad uwei u Forest Guard ka Assam ki la khlad noh ha ka jingïakynad ha Mukroh.
“Ngi pynpaw ka jingsngewsih bad ngi pynrem ruh ïa ka Sorkar Meghalaya, haba ngi ïoh ïa ka khubor, ba ka Sorkar Jylla jong ngi ka shimsting halor kane,” la pynpaw u Working President ka KHNAM u Bah Thomas Passah ha u kyrwoh khubor.
U la ong ba ki jingthoh kiba ka Commission ka la ïohpdiang ki long tang na ka liang ka Sorkar Assam, ki bor District bad Pulit ka Assam bad na ki ’riew paidbah na Assam.
U la ong ba mynta ka Commission ka la kyntu ruh ïa baroh kiba thmu ban ai jingtip/jingthoh ba ki dei ban leh ïa kaba donkam khnang ba ka jingbishar kan long kaba bniah.
“Ngi sngew ba ka dei ka kamram jong ka Sorkar ban ïarap lem ïa ki Khasi ki jong ngi kiba na ka shnong Mukroh kiba lah ban ai jingtip lane kiba long ki sakhi ha katei ka jingjia, namar ïoh tang namar ka jingduk jingkyrduh lane ka jingbymtip, kan pyndkoh ïa ka jingbishar kaba hok. Ngi la ïohi ïa ka jingïoh bor bad jingleh shlur jong ki Karbi ha ki thaiñ khappud ha kaba ha Khanduli ki la pynïeng ïa ka khyrdop lum khajna ha Khanduli bad haduh u pud ba ki la byrngem paidbah Pnar jong ngi ba kin ym bit ban thaw kynhun lane seng, haba maki pat ki la thaw da ka seng lehnoh kumba la paw lyngba ki lad pathai khubor,” la ong u Bah Thomas.
Ka jingshah bthat jubor jong 5 tylli ki mynsiem ha Mukroh ka dang shu jia hynrei ka long kaba sngewsih ban ïohi pat ïa ka jingkloi ban pjah na ka liang ka Sorkar bad baroh kiba la pynpaw ïa ka jingpynrem bad jingbitar halor kane ka kam.
“Lada ka Sorkar Jylla kan dang sngapjar ha kane ka jingkhot ka commission ha ka 7 tarik mynta u bnai kan long kaba sngewsih ïa ngi lang baroh bad kaba ai mynsiem pat ïa ki Karbi ba kin leh katba mon bad pynïap ïa kat kiba ki kwah,” u la ong.
