Shillong, Nailar 04:
U Chairperson ka Meghalaya Human Rights Commission (MHRC), u Justice T. Vaiphei ha ka jingsynranlang ki dkhot ka Commission, ka Kong B Giri bad U P.J.P Hanaman ki la pynlong ïa ka jingjurip kaba kyndit ïa ka District Prison & Correctional Home kaba don ha Jowai ha ka 4 tarik mynta u bnai ha ka jingïadonlang u Bah F.M. Dopth uba long u Secretary jong ka Commission.
Ha ka jingjurip na ka liang ka Commission ka la lap ba kane ka patok ha Jowai ka long kaba khapngiah haduh katta katta namar katkum ka jingmang, dei ban set tang 120 ngut ki briew. Kumba ka long mynta, ki don haduh 298 ngut kiba shah set.
Ha kane ka sngi na ka liang ka Commission ka la kyntu ïa u Deputy Superintendent ka District Prison & Correctional Home ban pynlong kamra sah ïa ka hall jong ka Vocational Training na ka bynta ki briew ba shah set khnang ban lah pynduna ïa ka jingkhapngiah bad la phah ban pynkynriah ïa ka kamra jong ka Vocational Training sha ki bynta jong ka kamra ba pynlong ïa ki Conference kaba kham heh.
Na ka liang ka Commission ka la khmih lynti ba ka sorkar jylla kan shna sa kawei ka ïing mala na ka bynta ban pynduna ïa ka jingkhapngiah jong kiba shah set hapoh kane ka patok.
Shuh shuh nalor ka jingkhapngiah ki kamra la sakhi ruh ba ha kawei-pa-kawei ka bynta jong ka Ward ba set ïa ki briew ka la don tang kawei ka paiñkhana. Ha man la kawei-pa-kawei ka ward, kiba pyndonkam ïa kawei ka paiñkhana ki long haduh 50 ngut. Namarkata ka Commission ka la bthah ban shna shuh ïa ki paiñkhana ha ki Ward.
Nalorkata, ka Commission ka la bthah ïa u Deputy Superintendent ka patok Jowai ba un ai ïa ka kaiphod jong ki mukotduma kiba dang sah jong ki briew kiba shah set ha kane ka jaka khnang ba ka Commission kan shimti lyngba ka jingïatreilang bad ki Legal Service Authority khnang ban pyndep kloi ïa ki mukotduma jong ki bad kane kan long ka lad ban pynduna ïa ka jingkhapngiah jong ka patok.
Ha kane ka sngi na ka liang ka Commission ka la pynsngew ruh ïa ka jingbymhun halor ka jingbymdon jong ki doktor hapoh ka patok ha ka por ba ki wan jurip namar ki don shibun kiba la shah set ha katei ka jaka kiba donkam ïa ka jingsumar kaba kyrkieh.
