Shillong, Nailar 04:
Ka Dorbar Shnong Lawsohtun (DSL) ha ka Sngi Thohdieng ka la kren shai ba kam kwah shuh ban ïohi sa kawei ka Them Metor ka ban mih ha Mahadev Khola.
Ïa katei la pynsngew da u Rangbah Shnong ka Lawsohtun, Bah H. Rynjah haba kren sha ki lad pathai khubor hadien ka jingïakynduh bad ka Deputy Commissioner ka East Khasi Hills, Kong R.M. Kurbah.
“Ka jingwan ïakynduh jong ngi ïa ka DC ka long halor ka mat ba ïadei bad ka Mahadev Khola,” la ong u Bah Rynjah.
U la pynshai ruh ba ïa u pud u sam jong ka Lawsohtun, la ker tawiar da ka Wah Umjasai bad haba rung sha shnong, hap ban ïaid lyngba ki jingkieng la ka dei na ka phang shatei, shathie, mihngi ne sepngi.
“Haba phai pat sha ka Mahadev Khola, ka don shabar ka shnong jong ngi, shabar jong ka wah, kaba hap hapoh ka jingkhmih jong ka tnad khlaw ka Sorkar Jylla. Kumba ki paw ha ki jingpynbna ki barim ba la pynmih da kane ka ophis lyngba u ADC ha ka 25 tarik Nailur, 2014, la paw shai ba ïa katei ka jaka, la mang kumba 36,000 sq.ft. tam lane duna,” la ong u Rangbah Shnong.
U la ong ruh ba katkum katei ka jingthoh, ka Mahadev Khola ka hap ha kawei na ki bynta jong ka shnong kaba marjan bad ka Lawsohtun.
“Hadien ba ngi la ïohi ïa ki jingtei be-aiñ kiba la shu mih ha kine ki katto-katne snem – ki dukan, ki jaka sah kiba la pynïeng bad shna paka da ka dewbilat bad ‘Dyna Roof’, ka la long shaba palat ïa kaba la mang. Kine ki long kiei-kiei kiba ngi ruh ngi pyrshah haba ïadei bad katei ka jaka ha Mahadev Khola,” u la ong.
Haba kren halor ki kam sniew ha katei ka jaka, u Bah Rynjah u la pynkynmaw ïa uwei u samla rangbah napoh shnong uba la lait na ka ïap hadien ba u la shah bom sha tied ha ki briew kiba don ha katei ka jaka.
U la kynnoh ruh ba ki don ki ’riewniam kiba pynïaid ïa ka jaka leh niam ha katei ka jaka kiba ju mlien ban ïaid bakla ha kiba bun ki liang.
Ha kajuh ka por, haba pynkynmaw ïa u snem 1998 halor ka jingkam trai jong ki bor pynïaid ka Mahadev Khola ïa kawei ka jaka jong ka Kur Sohtun kaba don hapoh Lawsohtun da kaba ujor mukotduma, u Bah Rynjah u la ïathuh ba donbok uwei u ’riew rangbah napoh shnong u la mih shakhmat ban ïakhun ïa katei ka mukotduma ha kaba ka Kur Sohtun ka la jop bad ïoh biang ïa katei ka jaka sha lade.
Kumjuh, u la pynkynmaw ba ha u snem 1999, ka la don kawei ka jingshah kynnoh leh be-ijot ha Dharamshala kaba don ha katei ka jaka.
“Kane ruh ka dei kawei kaba la pynsaitmet shi kat dei ïa katei ka jaka. Mynshuwa ngi tip ïa katei ka jaka tang kum ka jaka mane Blei, ka don beit tang ka Mandir, Dharamshala bad ka sem masi. Ngi kyrpad ïa ki bor jong ka aiñ ba kin shimkhia lem halor kane namar ngi la ima ïa ka jinglong-jingman jong katei ka jaka,” u la ong.
Utei u nongïalam shnong u la ong ruh ba katkum ka jingïathuh u President ka KSU-Laban Circle, samla Reuben Najiar kitei ki briew ki la sdang phah aplikeshon ba ki kwah pynkylla ‘Guest House’ ïa katei ka Dharamshala ban pynshong ïa ki briew kiba wan ha katei ka jaka.
Halor kane, u la ong, “Na ka liang jong ngi, ngim sngewtynnad, ngim pdiang namar kane kam lah ban long. Ka shnong ka pyrshah jur ïa kane. Ngim kwah shuh ba nangne shakhmat ba ngin ïohi pat sa kawei ka Them Metor kan mih ha Mahadev Khola.”
Shuh shuh haba kylli u la bynrap ba ka DC ka la kular ban shimkhia bad kan sa ïapynbeit ïa katei ka kam ynda la shong ïa ka jingïalang ka ban sa long shen bad kan sa pyntip ruh sha ka shnong.
