Shillong, Nailar 04:
U Symbud Myntri Rangbah ka jylla, Bah Prestone Tynsong, u la bthah ïa ki pulit ban wad ïa kiba donkti ban kynthoh da ki kyntien pynshit kiba lah ban wanrah ka jingsngewpher ha ka liang ka niam ne jaitbynriew haba ïadei bad ka jingjia ha Mahadev Khola.
U Bah Prestone u la pynpaw ïa kane halor ka jingkynthoh lyngba kawei ka kynhun Legal Rights Observatory (LRO) kaba la pynwan ïa ka jingjia ha Mahadev Khola kum ka jingjia namar ka niam.
Dang shen ka la don ka jingjia ha katei ka jaka ha kaba la mih ka huri-hura namar ka jingïania ha kawei ka dukan ha katei ka jaka.
U Bah Prestone u la ong ba u la pule ïa ki kaiphod halor ka jingjia ha Mahadev Khola kaba dei tang na ka daw jong ka jingïasngewthuh bakla kaba rit bad kam don jingïadei eiei ruh em bad ka niam.
Hynrei u la ong ba kaei kaba la paw ha ki rynsan Social Media ka long ba kawei ka kynhun kaba la tip kum ka LRO ka la pynmih ki jingkynthoh bad shibun ki jingpynshit ha kaba na ka liang jong u, u la bthah ïa ki pulit ban wad ïa ki briew kiba donkti ha ka ban pynmih ïa kum kine ki jait jingkynthoh bad la ïohi ïa shibun ki jingpynshit.
U la ong ruh ba ka jingleh kumne, ka paw ba ki briew kiba leh ban pynshit, ym i kop shuh ba kin dei ki nongshong shnong ka ri India namar lada ki dei ki nongshong shnong ka ri, kumno kin lah ban shu kynthoh kulmar, kaba lah ban wanrah ïa ka jingkulmar bad ka jingbym sngewthuh jingmut kaba lah ruh ban wanrah ïa ka huri-hura bad ka jingma.
