Shillong, Nailar 04:
Da ki hajar ngut ki samla kynthei bad shynrang kiba la pyndep ïa ka jingpule Nursing, ki la poi sha ka lympung ka ban plie lad ïa ki ban ïoh leit trei Nurse shabar India.
Ïa kane ka lympung ban jied ïa ki samla ka Jylla ba kin ïoh kam Nurse shabar India la tip kum ka Overseas Nursing Job Fair, kaba la pynlong da ka Sorkar Jylla ha State Convention Centre ha ka sngi Thohdieng.
Ka jingkyrduh kam Nurse ha Jylla ka la paw shynna lyngba ka jingwan poi jong ki hajar ngut ki samla kiba la pyndap smam ïa baroh lai tylli ki Hall ka State Convention Centre ha kaba ki la ïashimbynta na ka bynta ban shah jied ban shah hikai pyntbit ïalade khnang ban ïoh kam Nurse shabar ri kum ha Japan, United Kingdom, United Arab Emirates, Germany, bad Australia lyngba ki kompani kiba ka Sorkar ka la ïateh soskular.
Ha kane ka sngi la wan ban sakhi lang bad ai mynsiem ïa ki samla da u Myntri Rangbah ka Jylla, u Conrad K Sangma lem bad ka Myntri ka tnat ka Koit ka Khiah ka Kong Ampareen Lyngdoh nalor ki ophisar ka tnat ka koit ka khiah bad ki briew na ki kompani kiba wan ban jied ïa ki samla kiba biang ban shah hikai pyntbit ha shwa ban leit trei shabar ka ri India.
Haba ai jingkren ha kane ka sngi, u Conrad u la ong ba kane ka dei ka lad kaba ka Sorkar Jylla ka la plie na ka bynta ki samla kiba la pyndep ïa ka jingpule Nursing. Kane kan long ka jingmyntoi ym tang ïa ki shimet, hynrei ïa ka ïing ka sem bad ka Jylla namar lada ki ïoh ban leit trei shabar ri, ka ïoh ka kot ruh kan kham biang lyngba ka jingkamai jong ki.
Haba pynpaw ka India ka don ka jingkhlaiñ lyngba ki samla bad ka long ka lad ban kyntiew ïa ka ïoh ka kot lyngba ki jingïadei bad kiwei ki ri, u la ong ba nalor ka kam Nurse, ka Sorkar ka dang peit ruh ban thaw lad lang ha kiwei ki bynta.
U la ai nuksa ïa ka Bangladesh ha kaba ka jingwan ka pisa lyngba ka jingdon kiba na ka ri kiba trei shabar ri ka la wanrah jingkylla ha ka jingkynshew pisa bad kyntiew ïa ka ïoh ka kot.
Kumta u Myntri Rangbah u la kyntu ïa ki samla ki ban sa shah jied ban nym kynran dien ban shah hikai bad leit trei shabar ri. Nalor kata, u la kular ruh ba ka Sorkar kan kyrshan ïa ki ha kane ka jingleit shah hikai jong ki da kaba mang lypa T.50,000 marwei na ka bynta ka bai siew ban shah hikai pyntbit.
Nangta, u la ong ruh ba ka Sorkar ka phaikhmat sha ka koit ka khiah bad shim bun ki lad ki lynti ban pynduna ïa ka jingkhlad ki longkmie ba dang pun bad kha khyllung ha kaba u la batai shaphang ka prokram kaba tip kum ka MOTHER bad ka jingthung ïa ki doktor kaba la shah teng mynshwa kumba 7 ne 8 snem.
U la ong ruh ba ki samla ka Jylla ki don ka lad ban kiew ha ka liang ka put ka tem, kam jngohkai bad ki kam jingtei jingshna.
Katba na ka liang ka Kong Ampareen ka la ong ba ka jingdon jong ki samla kiba la dep pule nursing hynrei khlem ïoh kam ka la pynkhia jingmut ïa ka Sorkar bad ma ka kum ka Myntri ha kaba ka tnat ka koit ka khiah ka hap ban shim ïa kane ka sienjam.
Ka Kong Ampareen ka la kyntu ïa ki samla ban ïaishah ban poi sha ka jaka kaba ki thmu ban poi na ka bynta ban shakri ïa ki parabriew ha kiwei pat ki ri, bad ka Sorkar kan ïai don bad ki.
Ka la ong ruh ïa ki ban pyndonkam bha ïa ki kor ki bor bad pyntbit ïa ki jait ktien bapher bapher khnang ban suk haba ki leit trei sha kiwei ki ri, bad kim dei ban kynjah ïing ne kynran dien noh.
Shuh shuh ka Kong Ampareen ka kyrmen ba ka Meghalaya kan sa long kum ka Kerala kaba lah ban phah briew ban leit trei shabar ri kynthup ha ka kam Nurse.
Ka la ïathuh ruh ba kum kane ka jingpynlong kan sdang biang ha ka Tura ruh ban plie lad ïa ki samla jong ki, bad bynrap ba ka Sorkar kan snohkti ban ïarap ïa ki samla ha bun ki liang.
Ha kane ka sngi la ïoh jingkren ruh na u Commissioner Secretary u Zoram Beda nalor u MD ka NHM bad DHS (MI).
