New Delhi, Nailar 04 (UNI):
Ka Supreme Court ha ka Sngi Thohdieng ka la pynsangeh ïa ka hukum jong ka Gujarat High Court kaba la pynksan ïa ka jingshah rai pynrem jong u nongïalam ka seng Congress, u Rahul Gandhi, halor ka jingkynthoh ka jong u pyrshah ïa kiba don ïa ka jait ‘Modi’ ha u snem 2019.
Ka jingpynsangeh ka Supreme Court ïa ka hukum ka High Court ka long na ka daw ba u nongbishar uba la rai pynrem u khlem ai daw eiei balei la pynrem ïa u Rahul Gandhi haduh ar snem ha ka mukotduma kaba ïadei bad ki kam pynthohbria ïa kiwei.
Ha ki mukotduma kiba ïadei bad ka jingpynthohbria ne ‘Criminal Defamation’, ka jingpynsaja kaba heh duh ka dei ka jingrai pynrem haduh ar snem. Lada u MP ne MLA ki shah rai pynrem palat ar snem, kin hap duh noh ïa ka jinglong MP/MLA, bad kane ka la jia ruh ïa u Rahul.
Nalorkata, ka Supreme Court ka la ong ba ka jingshah mait kyrteng jong u Rahul kum u MP kam ktah tang ïa u shimet, hynrei wat ïa ki paidbah jong ka konstitwensi jong u. U Rahul u dei u MP ka Lok Sabha na Wayanad konstitwensi kaba don ha ka jylla Kerala.
Ha kajuh ka por, ka Supreme Court ka la maham ïa u Rahul ba u dei ban kham husiar haba kynthoh ïano-ïano.
“Kam don jingartatien ba ki jingkynthoh jong u (Rahul) ki long ki bym sngewtynnad,” la ong u Justice BR Gavai ha ka hukum jong u. Hynrei ka Supreme Court ka la ong ruh ba ka jingshah rai pynrem jong u Rahul ha u nongbishar kam long satia halor ki nongrim kiba biang.
“Ïa ka hukum ban rai pynrem la pynsangeh noh shwa,” la ong u Justice Gavai.
Ka jingshah rai pynrem jong u Rahul ha kawei ka ïingbishar ha Surat, Gujarat mynta u snem ka long namar ka jingkynthoh jong u ha ka jingïalang paidbah kaba la long ha Kolar, Karnataka ha u Ïaïong 2019. Ha kane ka jingïalang, u Rahul u la kynthoh da kaba ong, “Balei ba baroh ki nongtuh ki don ka jait Modi?”
Ha kaba ïadei bad kane ka jingkynthoh, uwei u nongïalam ka BJP, u Purnesh Modi, u la leit ujor sha ïingbishar halor ka nongrim ba u Rahul u la pynthohbria ïa baroh kito kiba don ïa ka jait ‘Modi’.
