Shillong, Nailar 04:
Ki pulit ka Ri-Bhoi District ki la ïoh kem ïa ki 7 ngut ki snar nonglute ïa kiba la kynnoh ba ki la donkti ban leit lute na ki artylli ki shlem tylliat maw kiba don ha Umduba bad Umnowe Killing kiba hap ha thanat Khanapara.
Katkum ka khubor na ki pulit, la ong ba kitei ki 7 ngut ki dei na ka shnong Umduba bad la ïoh kurup ïa ki tiar siat kum ka Rifle bad Pistol nalor kiwei pat.
Ka jingïoh kem ïa kitei ki 7 ngut ka long hadien ba ki pulit ki la pynlong ïa ka jingtohkit halor ka jingshah lute na ki artylli ki shlem tylliat maw.
Ha ka jingjia banyngkong ha ka 22 tarik Jymmang, 2023, ki la don ki runar kiba la leit lute na ka shlem tylliat maw kaba don ha Umduba. Na kane ka shlem, ki la ïoh ban kit ïa ka pisa kaba T.85,400. Hadien kata, ka la don sa kawei pat ka jinglute na ka shlem tylliat maw ha Umnowe Killing ha kaba na kane ka shlem, ki runar ki la ïoh ban lute T.1,90,000.
Ki pulit haba ïadei bad kitei jingjia ki la thaw da ka kynhun tohkit bakyrpang ban buddien. Ha ka jingtohkit la pyndonkam ïa ki nongsyntiat, bad ka jinglum jingtip lyngba ki kor ki bor katkum ka Forensic Science ban sngewthuh mano kita kiba la donkti ha kitei ki kam lute. Da ka jingtohkit kaba khlem shongthait, ki pulit ki la lah ban kem shwa ïa 7 ngut kiba la donkti ha kitei ki kam lute.
Kine kiba la shah kem ki dei kiba la ithuh kum u Kendil Marak, Rechil Momin, Wilsh Marak, Robert Momin, Marcus Marak, Bimod Marak bad u Colin Marak. Kine baroh ki dei na ka shnong Umduba.
Nalor ki tiar siat, la ïoh kurup ruh ïa ki jaiñ ki nep ba ki pyndonkam ha ka por ba ki leit lute.
