Shillong, Nailar:
U Myntri ka tnat Animal Husbandary, Bah A.L Hek u la ong ba ka sorkar kam lah ban pynïaid hi ïa ka kam ri jingri kum ka jingri syiar ne sniang, hynrei ka la ailad ïa ki paidbah lyngba bun tylli ki skhim.
“Lada ïa ki kam ri jingri ngin pyntrei hi noh da ka sorkar, kumta kiba bun ki projek ka sorkar kin ym treikam kumba la khmih lynti,” la ong u Bah Hek haba kren sha ki lad pathai khubor ha ka sngi Balang.
Lah ban pynkynmaw ba na ka liang ki nongïalam jong ka Federation of Khasi Jaiñtia and Garo People (FKJGP) kiba la ïakynduh ïa u Bah A.L Hek, ki la kyntu ba la donkam ïa ka sorkar ban sdang noh da ka Poultry bad Piggery Mission ha Mawkyrwat.
“Ha baroh ki District jong ka jylla, ki don ki ophis jong ka tnat Veterinary bad na ka liang ki paidbah ki lah ban aplai ïa ki skhim bapher bapher bad na ka liang ka sorkar kan ïarap ïa ki paidbah ban ïoh ri jingri la ka dei ban ri syiar ne ri sniang,” la ong u Myntri.
Nalor kata, u la ong ba lada ka sorkar ka pyntrei ïa kano kano ka kam lane ki projek kham ñiar eh ba kin long kiba seisoh bad dei namar kane ka sorkar lyngba ka Poultry bad Piggery Scheme, ka ai jingïarap ïa ki paidbah ban seng kam ban ïoh kamai kajih bad ban kyntiew ïa ka ïoh ka kot ha la ki shnong.
“Lada ki paidbah ki pyntrei hi ïa ki skhim, ki ïoh ruh ban ai kam ai jam ïa ki khun samla bad kan ïarap ban kyntiew ïa ka ïoh ka kot,” u la ong.
