Shillong, Nailar 04:
U Myntri Rangbah ka jylla, Conrad K Sangma u la ïakren bad u Myntri Rangbah ka Assam, Himanta Biswa Sarma halor ka jingmih ka kynrum-kynram ha Block-I bad u la ong ba hadien katto katne kan sa don ka jingleit jngoh ïa katei ka thaiñ da baroh ar ngut ki Myntri Rangbah hadien ka 15 tarik mynta u bnai.
U Conrad u la ong ba u ïakren bad u Himanta la bunsien haba ïadei bad ka jinglong jingman ha thaiñ Block-I ha kaba la mih ka jingbymsuk ha katei ka thaiñ.
Ka la don ka jingkynnoh ba ki paid Khasi Pnar ki shah pyndik man ka por ha katei ka jaka.
U la ong ba ha kine ki 4 sngi ba la dep, u la ïakren bad u Himanta ym duna ïa ka 10 sien bad u la kular ban shimkhia ïa kane ka bynta ha kaba ka la don ruh ka jingïakren hapoh ka Sorkar Assam haba ïadei bad ki jingjia kiba ju mih ha thaiñ khappud.
U la ong ba u kyrmen ba yn sa lah ban pynbeit ïa kane bad hadien ka 15 tarik yn sa ïoh ban leit jngoh ïa katei ka jaka, watla ha kine ki bnai ba la dep ym shym la lah ban leit namar ka jinglong jingman.
Ha kawei pat ka liang, u Symbud Myntri Rangbah, Bah Prestone Tynsong u la ong ba ka jingmih ka kynrum-kynram ha thaiñ Block-I ka dei kaba u Myntri Rangbah u la ïakren bad u Myntri Rangbah ka Assam.
Haba kylli halor ka jingong ba ka Meghalaya ka dei ban phah pulit sha Block-I, u Bah Prestone u la ong ba katkum ka jinglong jingman, ka Block-I ka hap ha jingpeit jingkhmih ka Assam, kumno yn phah pulit shathie, hynrei kaba lah ban leh ka long ka jingïakren hapdeng ki Myntri Rangbah jong ka Jylla bad ka Assam.
