Shillong, Nailar 04:
Ki ju ong ba haba pang ba shitom kiba la heh ne rangbah ka kham shirukom namar ki lah ban kren bad pan ïa kaei haba ki kwah. Pynban lada shitom pat ki khyllung khynnah ki shu ïam namar ba kim pat lah ban kren.
Na ka liang U Nongsaiñ Hima u la ïoh ban wanrah ïa kawei ka khubor shaphang uwei u heprit uba dang 2 snem shiteng uba don ïa ka jingshitom ha ki khmat ha ki bynta na kamon jong ka khmat. Une u heprit u lah shem shitom ban peit ne ïohi ïa kane ka khmat namar ba ka don ka jingkah kaba lieh kaba la pynlong ïa u ba un duh syndon ïa ka bor ïohi na kane ka khmat.
Ïa une u heprit la tip kyrteng kum u Josaiah Dhar uba dei u khun jong ka Kong Willsy Dhar ba shong ba sah ha Umpling Dong Sharum.
Haba pyrshang ban wad bniah ïa ka jingpang kaba une u heprit u ïoh ka dei ïa kaba la tip kum ka Corneal Ulcer ne ka jingdon ki kynja balieh ba kah hapdeng ki khmat.
Haba pyrshang ban ïakren bad ka kmie une u khyllung, ka Kong Willsy Dhar ka la ong ba kane ka apot kaba la wan jia ha u khun jong ka, ka dei naduh ka por ba kha ïa u bad pynlong syndon ïa u ban matlah ne ym ïohi shuh na kawei na ki bynta jong ka khmat wat la na ka liang jong ki, ki la pyrshang katba don ki lad ban shim dawai.
Ka Kong Willsy ka don saw ngut ki khun. Ma ka bad u lok ki shu im tang da kaba bylla sngi ban ïoh bam bad pynheh pynsan ïa ki khun.
Ka Kong Willsy ka la ïathuh ba ha ka por ba la kha ïa utei heprit, ka la ïohi ïa ka jingkah ha ka khmat jong utei u heprit. Kumta na ka liang jong ka, ka la ong ïa ki doktor bad ki nos ba kin khmih ïa utei u heprit. Na ka liang ki doktor ruh ki la phah ïa kitei ki kmie ki kpa jong utei heprit ban leit phah sumar sha Bansara Eye Care.
Na ka liang ka jaka ai jingsumar khmat ha Bansara Eye Care, ki la ong ba kim lah satia ban sumar ïa ki khmat jong utei u heprit ha katei ka jaka bad ki la phah ban sumar sha Guwahati.
Ka Kong Willsy ka la ïathuh ruh haba pyrshang leit shim dawai na ki jaka ai jingsumar, ki doktor ki la pyntip ïa ka ba kum kane ka jait jingpang ka long kaba eh ban sumar hapoh ka jylla bad ki la ai jingmut bad kyntu ban leit phah sumar sha Guwahati.
Haba pyrshang ban kylli ïa ka dor jong ka bai sumar ha Guwahati, na ka liang ki doktor ki lah shu ai jingkheiñ malu mala da kaba ong ba ka jingsumar kan poi ym duna ïa ka T. 1 lak tam eiei.
“Nga pat ha ka jingsngew kumta, nga la rai keiñ ba ngam sngewdon lad kat kata ka jinglut, te nga la rai hi marwei ba ka mat long kumno-kumno namar ba U Blei U la ai kumne, te nga ong ngan shu hun la ka hun noh keiñ hynrei lehse ïoh ka dei ka jingplie lad jong U Blei ba kan wan biang pat kum kane ka lad ba U Blei un ktah ïa ki para briew ba ki don ka jingsngew ban ïarap lane ban ïa synñiang lem”, la ong ka Kong Willsy.
Ka Kong Willsy ka la ïathuh ba ïa utei u heprit la kha synrap lang bad iwei i khyllung shynrang, hynrei ita iwei i khun synrap i la khlad noh.
Ka la ïathuh ba ka la leit mih ha Nethralaya Eye Care ban kylli ïa ka dor jong ka bai sumar, hynrei na ka liang jong katei ka jaka sumar ruh ka la ong ba kam lah satia ban sumar ïa utei u heprit shane shapoh Shillong bad ki la phah beit sha Guwahati.
Haba kylli la hato ka la leit pan jingïarap na ki nongmihkhmat, ka Kong Willsy ka la ïathuh ba ka la leit mih sha ki nongmihkhmat ban pan jingïarap, hynrei ka jingai jong kitei ki nongmihkmat kam kot haduh ban da dap ka bai ai jingsumar ïa utei u heprit wat hapoh Shillong ruh kam kot satia.
Kumta halor kane ka bynta, na ka liang ka Kong Willsy ka la buh ka jingkyrpad hakhmat ki paidbah kaba kynthup naduh ki nongmihkhmat ne kino-kino ki briew kiba don ka mynsiem ban ïarap, kin sngewbha ban kner ïa ki lad jingïarap ne ban synñiang na ka bynta ban lah ban phah sumar ïa une u khyllung.
Ha kajuh ka por, na ka liang ka Kong Willsy ka la pyntip ruh ba ki briew kiba don ka mynsiem ban ïarap ki lah ban shu phah ïa ka pisa lyngba u Gpay nombar 9774148051 lane u UPI ID uba la tip kum willsydhar@okaxis.
