Shillong, Nailar 04:
U Myntri Rangbah ka jylla, Conrad K Sangma u la kyntait ban kren halor ka jingpynngat ka Meghalaya Lokayukta ïa uwei na ki MLA ha ka jingmudui lane ‘chargesheet’ kaba la phah da ka Meghalaya Lokayukta halor ki jingkynnoh bamsap.
Haba kylli shaphang u MLA, Sanjay A Sangma, u Myntri Rangbah u la ong ba um kren ei ei namar kane ka dei ka kam kaba la ïaid ha ka jingbishar.
U Sanjay A Sangma, u dei u MLA ka NPP na Mahendraganj konstitwensi. U dei napdeng ki 12 ngut kiba la shah pynngat ha ka jingmudui lyngba ka Meghalaya Lokayukta.
Lah ban pynkynmaw ba ïa ka jingujor la phah da u Kingstone Bolwari Sangma pyrshah ïa u Sanjay A. Sangma bad kiwei pat halor ka jingkynnoh ba pyntrei khlem dep ïa ka projek kaba dei ka MDC Hostel ha Tura kaba kot sha ka T. 6,01,31,100.
