Shillong, Nailar 06:
U President ka Khasi Students’ Union (KSU) Sengkmie, Bah Lambokstarwell Marngar u la ïathuh haba ki nongïalam ka KSU ki leit mihkhmat ïa ka kynhun North East Students Organisation (NESO) haba ki leit jngoh ïa ka jylla Manipur ki ïoh ruh ban ïakren bad ki nongïalam sengbhalang bad ïa u Myntri Rangbah ka Manipur ba kin ai jingïada ïa ki Khasi kiba leit pule sha Imphal.
Kum ban shu pynkynmaw, ka NESO hapoh ka jingïalam u Bah Samuel Jyrwa kum u Chairman ryngkat palat phra tylli ki seng samla pule na ki jylla bapher bapher ka thaiñ shatei lam mihngi ki la leit jngoh ïa ka Manipur halor ka jingïakynad kaba la neh mynta la lai bnai hapdeng ki Kuki bad Meitei.
Na liang ka KSU la mihkhmat da u Bah Lambokstarwell Marngar kum u President bad u Bah Donald Thabah kum u General Secretary.
Haba ïakren bad u Bah Lambokstarwell u la ïathuh haba u la poi sha ki jaka sah ki Kuki bad ki Meitei ka long shisha kaba isynei ïa ki khyllung, ki khynnah bad ki tymmen namar ka jingïakynad kaba la shyrkhei ha katei ka jylla.
Nangta, u la ïathuh ba ka seng haba ka la poi sha Imphal ka la ïakren ruh ïa ki nongïalam sengbhalang ba kin ai jingshngaiñ haba ki wan pule namar ki don ki samla Khasi kiba la poi sha katei ka jylla ban pyndep ïa ka eksam kum ka Central Agriculture University.
Shuh shuh u la ong ba haba ki nongïalam NESO ki la poi ha Manipur ki lap ba kam pat long shngaiñ baroh arliang ki jaidbynriew hynrei kane baroh ka shong beit ha ka Sorkar India ba kan tuklar mardor.
“Kum u dkhot jong ka NESO, ngi leit sha Manipur ban wad ïa ka jingsuk, namar dei tang ka jingïasuk ban wanrah ïa ka shong suk shong saiñ hapdeng kitei ki ar jaidbynriew namar ngi ruh ngi sngewkhia haba kawei na ki jylla ha thaiñ shatei lam mihngi ka mih kum kane ka jingïakynad kaba la paw pyrthei baroh ka ri India” u la ong.
Ha kajuh ka por u la pyntip ba ka NESO ka dei tang ka kynhun ki samla pule ka kwah ba ki samla pule kim dei ban duh haba wan kum kane ka jingïakynad, hynrei lada ka dang bteng ïa ka jingïakynad kan sa shong pyrkhat biang.
